Astanada júrgen amerıkalyq AQSh Kongresi saılaýyna qalaı daýys berdi
ASTANA. QazAqparat - Amerıka azamatshasy Ellen Pınchýk AQSh Kongresi saılaýy júrip jatqan kezde «Jumbaqtas» qonaqúıi qyzmetkerleriniń arqasynda azamattyq boryshyn ótep, daýys bergen. Bul týraly ol QazAqparat tilshisine bergen suhbatynda aıtty.
Ellen Pınchýk reseılik kompanııada jumys isteıdi. Ol óz elinde bolmaǵan kezde daýys berý protsesiniń qalaı júretinin aıtyp berdi.
«Men amerıkalyq saılaýǵa qashyqtan daýys beremin. Maǵan bıýlletendi poshtamen jiberedi. Buryn Kalıfornııa shtatynda turǵandyqtan, daýys bergennen keıin bıýlletendi fakspen jiberýim kerek. Bıyl belgili bir sebeptermen bıýlletendi ýaqytyly ala almadym. Men kezekti is-sapardan kelgennen keıin tıisti organdarǵa bıýlletenim joqtyǵyn aıtyp, osy máseleni sheshýdi suradym. Olar maǵan bıýlleteni bar siltemeni jiberdi. Biraq, bul silteme Reseıde ashylǵan joq, ıaǵnı ony bireý buǵattady», - dedi ol.
Ellen Pınchýk bıyl saılaýda daýys bere almaǵanyna ókingen. Biraq ol Qazaqstanǵa kezekti is-saparyna barǵan edi. Astanaǵa kelgen kezde bıýlleteni bar silteme ashylyp, endi ony shyǵaryp, Kalıfornııaǵa fakspen jiberý qajet bolǵan.
«Basyp shyǵaryp, daýys berip, bıýlletendi fakspen Amerıkaǵa, Los-Anjeles ýaqyty boıynsha 20:00 nemese Astana ýaqytymen tańǵy saǵat 10:00-ge deıin jiberý kerek boldy. Men únemi toqtaıtyn «Jumbaqtas» qonaqúıinde bıýlletendi shyǵaryp berdi, alaıda qonaqúıde halyqaralyq faks jiberý múmkindigi bolmady. Soǵan qaramastan mundaǵy qyzmetkerler basqa birqatar qonaqúılerge habarlasyp, halyqaralyq faksty qaıdan jiberýge bolatynyn anyqtap berdi», - dep jalǵastyrdy E.Pınchýk.
Onyń aıtýynsha, Rixos qonaqúıinde halyqaralyq faks jiberetin bıznes-ortalyq bar bolyp shyqty. Biraq, jóndeý jumystaryna baılanysty faksty jiberý múmkin bolmaǵan.
«Rixos qonaqúıiniń qyzmetkerleri meni The Ritz-Carlton oteline jiberdi. Biraq, onda da resepshnde maǵan faks qabyldaı alatynyn, biraq jiberý múmkin emestigin aıtty. Qonaqúı qyzmetkerleriniń biri meni aıap ketken bolýy kerek, bıýlletenimdi surap alyp, halyqaralyq faks izdeýge ketti. 30 mınýttan keıin bıýlletenniń brondaý bólimi arqyly fakspen jiberilgenin habarlady», - dedi ol.
Osylaısha, búkil Astana Amerıka azamatshasynyń boryshyn oryndap, daýys berýine kómekteskendeı áser qaldyrǵan.
«Qazaqstandaǵy adamdardyń baýyrmal ekenine taǵy da kózim jetti. Olar únemi kómek berýge daıyn jáne adamgershilik turǵydan túsinigi mol», - dep túıindedi E.Pınchýk.
Eske salaıyq, keshe, 6 qarashada Amerıkada AQSh Kongresi qos palatasynyń aralyq saılaýy ótti. Saılaý qorytyndysy boıynsha amerıkalyqtardyń basym kópshiligi demokrattarǵa daýys berip, Palata ókilderiniń tolyq quramyn qaıta saılady. Senatta respýblıkalyqtar óz pozıtsııalaryn saqtap qaldy.
