Astanada «Júrek jylýy» aktsııasy ótip jatyr
ASTANA. QazAqparat - Ulystyń uly kúni Naýryz meıramyna oraı elordada «Júrek jylýy» aktsııasy ótip jatyr. Bul ıgi bastamaǵa alǵashqy bolyp «Almaty» aýdany ákiminiń apparaty, Astana qalasynyń Jastar saıasaty basqarmasymen birlese otyryp kiristi.
Aýqymdy is-sharaǵa aýdannyń belsendi jastar qoǵamdyq birlestikteri men óndiris oryndarynyń jas mamandary, L. N. Gýmılev atyndaǵy Eýrazııa ulttyq ýnıversıtetiniń jáne Eýrazııa gýmanıtarlyq ınstıtýtynyń stýdenteri de atsalysýda, dep habarlaıdy astana.kz.
Osylaısha belsendi top ókilderi Jeleznodorojnyı turǵyn alabynda jalǵyzbasty qarııalar men múmkindigi shekteýli jandarǵa qamqorlyq tanytyp, turǵyn úı aýlalaryn qardan tazartty.
Sonymen qatar, «Saryarqa» aýdany ákimdiginiń qyzmetkerleri Astana qalasynyń jastar saıasaty máseleleri basqarmasymen birlesip Kóktal jáne Óndiris turǵyn alabtarynda qarııalardyń turǵyn úıleriniń aýlasyn tazalaý jumystaryn uıymdastyrdy. Jalpy, sharaǵa 200 asa adam tartyldy.
