Astanada júrdek jeńil relsti kólik júıesin qurý jobasy boıynsha KSPMC konsortsıýmy konsýltant bolyp belgilendi
ASTANA. 2 sáýir. QazAqparat - Astanada júrdek jeńil relsti kólik júıesin qurý jobasyn basqarý boıynsha konsýltant retinde KSPMC (Kazakh Systra Projekt Management Consortium) konsortsıýmy belgilendi.
Bul týraly qala ákiminiń baspasóz qyzmetinen habarlandy.
Astana qalasynyń ákimdiginde «Astana qalasynyń jańa kólik júıesi» - 1 kezek» jobasyn basqarý máseleleri boıynsha qyzmetter» baıqaýynyń qorytyndysy boıynsha KSPMC-men tıisti kelisim-shartqa qol qoıylǵan bolatyn.
«Astana qalasynyń jańa kólik júıesi» jobasyna sáıkes, jeńil relsti kólik Qazaqstan astanasynyń kólik júıesiniń negizi bolady jáne qalanyń barlyq qoǵamdyq kólik túrlerin biriktiredi. Ol josparlanyp otyrǵan BRT júrdek avtobýs júıesimen jáne ITS ıntellektýaldy kólik júıesimen baılanysty bolady.
JRK júıesi Astana qalasynyń klımattyq jaǵdaılaryna tolyǵymen beıimdelip jasalady jáne zamanaýı dabyl, aqparat, baılanys jáne elektrondy jol júrý tólemi júıelerin qarastyrady.
JRK qurylysynyń 1 kezegi Astana qalasynda EXPO-2017 Halyqaralyq kórmesin ótkizýge daıyndyq sheńberinde kóliktik ınfraqurylymdy damytý úshin erekshe mańyzǵa ıe.
KSPMC konsortsıýmy álemniń kóptegen elderinde JRK jobalaryn josparlaý jáne basqarý salasynda kópjyldyq tabysty tájirıbesi bar Systra kompanııasynyń quramyna kiredi. Systra kompanııasy 1995 jyly qurylǵan. Shtab-páteri Parıjde ornalasqan.
