Astanada júnnen jasalǵan 7×4 metrlik Qazaqstan kartasy álemdik rekordqa usynylady

Qazaqstan kartasyn jasaý ıdeıasy qalaı týdy?

«Ónermen órilgen Qazaqstan» jobasynyń ıdeıasy kórkem eńbek sabaǵynda týǵan. Lázzat Atybaı oqýshylaryna júnnen shaǵyn buıymdar jasaýdy úıretip júrip, balalarmen birge aýqymdy týyndy jasaýǵa bel býǵan. Tańdaý Qazaqstan kartasyna túsken.

— «Nege bárimiz birigip, úlken dúnıe jasamasqa?» degen oı keldi. Maqsatym — ata-babadan kele jatqan kıiz basý ónerin dáriptep, balalarǵa úıretý. Sóıtip, Qazaqstan kartasyn jasaýǵa kiristik, — dedi Lázzat Atybaı.

Kartanyń negizine mata tóselip, jún arnaıy ınemen shanshyp óńdelgen.

Kartany jasaýǵa qansha jún jumsaldy?

Týyndyǵa 10–15 keli jún ketken. Matasymen qosa eseptegende onyń jalpy salmaǵy 25–30 kelige jetedi.

Júndi óńdeýge arnalǵan ıneler óte jińishke bolǵandyqtan, jumys kezinde jıi synǵan. Joba barysynda 2 myńǵa jýyq ıne jaramsyz bolǵan.

Kartada elimizdiń óńirleri túrli túspen beınelengen. Avtordyń aıtýynsha, reńkterdi tańdaǵanda aımaqtardyń tabıǵı erekshelikterin eskerýge tyrysqan.

— Almaty jaqty jasyl reńktermen, batys óńirlerdi sarǵysh tústermen berdik. Tústerdi ár óńirdiń ereksheligine qaraı tańdaýǵa tyrystyq, — dedi ol.

Oqýshylar joba barysynda neni úırendi?

Jobaǵa bastaýysh jáne orta býyn oqýshylary atsalysqan. Muǵalimniń aıtýynsha, jumys kezinde balalardyń qyzyǵýshylyǵy qolónermen shektelmeı, tarıh pen geografııaǵa da aýysqan.

— «Meniń týǵan jerim qaıda?», «Nege bizdiń oblystyń aýmaǵy kishkentaı?», «Nege Qaraǵandy úlken?» dep suraı bastady. Sodan ózderi izdenip, óńirler týraly málimet qarady. Osylaısha, kórkem eńbek sabaǵy tarıh jáne geografııamen de baılanysyp ketti, — dedi Lázzat Atybaı.

Pedagog balany qolónerge erte jastan baýlyǵan jón dep sanaıdy. Onyń pikirinshe, bala kúninde meńgergen óner keıin kásipke de aınalýy múmkin.

— Qyzdarǵa «Erteń osy ónerdi kásipke aınaldyrýlaryń múmkin» dep aıtyp otyramyn. Ózim de mektepte sabaq bere júrip, bos ýaqytymda tapsyrys alyp, qolónermen aınalysamyn. Bilgenimdi balalarǵa úıretkim keledi, — dedi ol.

Júndi nege shetelden alýǵa týra keldi?

Kartaǵa otandyq jáne sheteldik jún paıdalanylǵan. Aq jún Tarazdan alynsa, túrli tústi júnniń bir bóligi Reseı men Túrkııadan jetkizilgen.

Lázzat Atybaıdyń sózinshe, Qazaqstanda qolónerge qajetti daıyn, sapaly boıalǵan júndi tabý ońaı emes.

— Ózimizdiń ónimdi paıdalanýǵa tyrysamyz. Biraq túrli tústi júnniń bir bóligin Reseı men Túrkııadan aldyq. Olardyń boıaýy sý tıgende shyqpaıdy. Bizde de jún óńdeý isi damyp, ónim sapasy arta berse eken deımin, — dedi ol.

Pedagog elimizde jún óńdeıtin kásiporyndar kóbeıse, otandyq qolónerge de múmkindik artady dep esepteıdi.

— Ózimizde shıkizat bar. Ony ózimiz óńdep, paıdalanýǵa múmkindik bolsa, otandyq kásipti de qoldaımyz, — dedi Lázzat Atybaı.

Joba álemdik rekordqa usynylady

Joba Ustazdar kúnine arnalǵan. Uıymdastyrýshylardyń málimetinshe, kartany álemdik rekordqa tirkeý jónindegi ótinim GBR Global Best of Records uıymyna joldanǵan. Ótinimniń qabyldanǵanyn rastaıtyn resmı hat alynǵan. Týyndyny 29 qazanda álemdik rekordqa usyný josparlanyp otyr.

Sol kúni ulttyq qundylyqtarǵa arnalǵan 500 týyndyny tanystyrý da kózdelgen. Olardy elimizdiń ár óńirindegi muǵalimder ázirlep jatyr. Kartınalarda Qazaqstannyń tabıǵaty, tarıhı oryndary, qustary, ósimdikteri men ulttyq murasy beınelenbek.

— Ata-babamyz osy ónerdi bizge qaldyrdy. Endi ony dáriptep, balalarǵa úıretip, kelesi urpaqqa jetkizýimiz kerek. Ustaz retinde muny óz mindetim dep bilemin, — dedi joba avtory.

Kartanyń aldaǵy ýaqytta qaıda saqtalatyny ázirge belgisiz.

— Bul kartaǵa qanshama eńbek jumsaldy. Eger álemdik rekordqa enip, Ulttyq mýzeı alýǵa nıet bildirse, berer edim. Kópshilik kóretin jerde tursa deımin, — dedi Lázzat Atybaı.

Kórkem eńbek sabaǵynda týǵan bastama osylaısha aýqymdy jobaǵa ulasty. Avtor úshin onyń basty nátıjesi — balalardyń ulttyq qolónerge qyzyǵyp, el óńirlerin tanyp-bilýge umtylýy.

Buǵan deıin Aqtóbede jylyna 3 600 tonnaǵa deıin qoı júnin óńdeıtin kásiporyn iske qosylǵanyn jazǵan edik.