Astanada jumysshylardyń kóshi-qon protsesin tıimdi basqarý máselesine arnalǵan dóńgelek ústel otyrysy ótýde
dep habarlaıdy QazAqparat.
Atalmysh sharaǵa kásipodaq uıymdarynyń ókilderi men Parlament depýtattary jáne mınıstrlikter men vedomstvo qyzmetkerleri sondaı-aq halyqaralyq uıymdardyń elimizdegi ókildiginiń basshylary qatysýda.
Otyrysta kún tártibindegi másele jóninde sóz qozǵaǵan Qazaqstan Respýblıkasynyń Kásipodaqtar federatsııasynyń tóraǵasy Sııazbek Muqashevtyń sózine qaraǵanda, mıgranttar máselesi búgin tek Qazaqstanda ǵana qalyptasyp otyrǵan joq. Álemde jahandaný úderisi júrip jatqandyqtan buny álemdik deńgeıdegi másele deýge bolady. «Árıne, onyń problema týdyryp otyrǵan jaqtary da bar. Qazaqstan mıgranttardy kóp qabyldap otyrǵan elderdiń biri. Sondyqtaǵy bul baǵyttaǵy jumystar kóp eńbek etýdi jáne elimiz tarapynan naqty sheshimder qabyldaýdy qajet etip otyr. Keshe ǵana Parlament Májilisi mıgranttardyń quqyqtaryna qatysty konventsııany maquldady. Bul qujat mıgranttarǵa qatysty eldegi qalyptasqan máseleni sheshýge yqpal etedi degen úmittemiz. Kóshi-qon protsesterin retteıtin qujattar bizde jeterlik. Biraq olar áli de bolsa jetildirýdi qajet etedi jáne olardyń keıbiri tolyq kúshinde jumys istep otyrǵan joq. Sondyqtan bul máselemen tereńirek aınalysqan jón. Búgingi bizdiń basqosýymyzdyń maqsaty da osy», dedi S.Muqashev.
Osyǵan qaraı otyrysqa qatysýshylar eńbekshi mıgranttar máselesine qatysty elde qalyptasqan jaǵdaı jóninde ózara pikir almasyp, bul máselege qatysty Parlament depýtattarynyń pikirleri men memlekettik organ qyzmetkerleriniń málimetterimen tanyspaq.
