Astanada jumys jasaıtyn jastar úshin jaldamaly baspana salý jalǵasady

NUR-SULTAN. QazAqparat – Nur-Sultanda jumys jasaıtyn jastar úshin jaldamaly turǵyn úı baǵdarlamasyn júzege asyrý jalǵasady, dep habarlaıdy QazAqparat.

Búgin qala ákimi Altaı Kólginov birqatar áleýmettik turǵyn úı qurylysynyń barysymen tanysty.

«Byltyr Elbasynyń tapsyrmasyna sáıkes jumys isteıtin jastarǵa arnalǵan jalǵa beriletin turǵyn úı baǵdarlamasy iske qosyldy. Bıyl bul jumystardy jalǵastyramyz. Oǵan qatysý úshin qujattardy jınaýdyń bastalǵany týraly qosymsha habarlaımyz. Búgin tańerteńgilik aralaý kezinde birqatar qoljetimdi áleýmettik turǵyn úı qurylysynyń barysymen, onyń ishinde kelesi jyldarǵa arnalǵan qurylys barysymen tanystym.

Áleýmettik turǵyn úıdi kezekte turǵandar (halyqtyń áleýmettik álsiz toptary), turǵyn úı qurylys jınaq bankiniń salymshylary ala alady. «Qazaqstandyq ıpotekalyq kompanııamen» birlese iske asyryp jatqan áleýmettik páter alýshylar sanatyn kóbeıttik. Qoljetimdi baspanaǵa dárigerler, muǵalimderden basqa áleýmettik qyzmetkerler, polıtseıler, mádenıet qaıratkerleri men sportshylar úmitker bola alady.

Bıyl Prezıdenttiń tapsyrmasyna sáıkes qoljetimdi turǵyn úı kólemi úsh ese artty», - dep jazdy A.Kólginov Instagram-daǵy paraqshasynda.