Astanada jumys isteıtin 18 myń mekemeniń 1,5 myńynda ǵana ujymdyq kelisimder jasalǵan - Kásipodaqtar keńesiniń tóraǵasy
ASTANA. Sáýirdiń 29-y. QazAqparat /Gúlmıra Álıakparova/ - Astanada jumys isteıtin 18 myń mekemeniń segiz paıyzy, ıaǵnı 1,5 myńynda ǵana jumys berýshi men jumysshylardyń arasynda ujymdyq kelisimder jasalǵan.
Búgin qaladaǵy Kongress-Holl saraıynda ótken eńbek zańnamasy boıynsha jalpyqalalyq semınar-keńeste, Astana qalasy boıynsha Kásipodaqtar keńesiniń tóraǵasy Sársenbaı Myńbaev atap kórsetkendeı, kelisimsharttarǵa otyrý bastamasy jumys berýshilerden ǵana emes, jumysshylardyń ózderinen de shyǵý kerek. Bul eńbek zańnamasymen qarastyrylǵan. Al jumys berýshi bul bastamadan bas tartyp jatsa, ol zań júzinde ákimshilik jaýapqa tartylyp, 500 aılyq eseptik kórsetkishke deıin aıyppul tóleýi tıis bolady.
Elimizdiń bas qalasynda Eńbek kodeksiniń bul talaptarynyń oryndalý úrdisi nelikten tómen degen saýalǵa jaýap bergen S.Myńbaev: «Onyń basty máselesi kóptegen jumys berýshiler men jumysshylardyń ujymdyq sharttyń máni men maǵynasyn jiti túsinbeýshiliginde. Búgingi semınar-keńeste bul máselege jeke toqtalyp otyrǵanymyzdyń sebebi de osy. Ujymdyq shartta eńbekkerdiń jumys jaǵdaıy, jalaqysy, demalysy qarastyrylady. Bul adamnyń jeke basynyń quqyǵy. Al sharttarǵa otyrmaǵan jumysshylar, búgingi kúnde qandaı quqyqtyq aktilerge negizdelip jumys istep jatqany maǵan túsiniksiz», - deıdi.
Kásipodaq tóraǵasynyń aıtýynsha, qaladaǵy 18 myń kásiporynnyń 226-synda kásipodaqtar jumys isteıdi. Olardyń 95 paıyzynda ujymdyq shart jasalǵan.
Aıta keteıik, ujymdyq shart jasaý týraly jalpyrespýblıkalyq aktsııaǵa bastaýdy 2008 jylǵy qańtardyń 24-inde Jezqazǵan qalasynda ótkizilgen bıznestiń áleýmettik jaýapkershiligi jónindegi respýblıkalyq forýmda Qazaqstan Respýblıkasynyń Prezıdenti N.Á. Nazarbaev bergen bolatyn. «Bul aktsııa jalpyulttyq bolýy jáne meıilinshe kóp jumys berýshiler men jumysshylardy qamtýy tıis. Bunyń barlyǵy, saıyp kelgende, halqymyzdyń ál-aýqatyn arttyrý úshin jasalady», - dep atap ótken bolatyn Elbasy.
