Astanada jumysshy mamandyqtardy qoldaýǵa baǵyttalǵan baıqaý ótti
ASTANA. KAZINFORM – Bıyl Jumysshy mamandyqtar jylyna oraı «Astana jastary» ortalyǵy tehnıkalyq baǵyt boıynsha jańa nomınatsııalardy engizip, «Úzdik» jobasyn keńeıtti.
Sonyń ishinde alǵash ret jol qaýipsizdigimen tyǵyz baılanysty «Úzdik shınomontajshy - 2025» baıqaýy uıymdastyryldy.
Shara jastardyń kásibı daǵdylaryn arttyrýdy, tehnıkalyq mamandyqtardyń qoǵamdaǵy bedelin kúsheıtýdi jáne jumys berýshiler men jas mamandar arasyndaǵy baılanysty nyǵaıtýdy kózdeıdi.
«Úzdik» jobasy birneshe jyldan beri ótkizilip keledi. Alaıda bıyl erekshe format usynylyp, jumysshy mamandyqtarynyń keń spektri qamtyldy.
- Bul jyly biz buryn bolmaǵan mamandyqtardy qostyq. Onyń qatarynda dóńgelek jóndeý sheberi, aǵash ustasy, jıhaz óndirisiniń mamany, florıst, meıramhana servısi, aspaz, tárbıeshi, santehnık, temir jonýshy, mehanızator, júk jáne avtobýs júrgizýshileri sııaqty baǵyttar bar, - dedi «Astana Jastary» resýrstyq ortalyǵynyń mamany Dáýirjan Jumahan.
Ol bul bastama óndiristik salalarǵa jańa kózqaras qalyptastyryp, jastardy eńbek naryǵyna beıimdeýge múmkindik beretinin atap ótti.
Qatysýshylar 16 men 35 jas aralyǵyndaǵy kolledj stýdentteri, jumysshy jastar jáne tehnıkalyq qyzmet kórsetý salasynyń mamandary. Olardyń eńbekterin kásibı sheberler baǵalady.
- Bul jobanyń naqty nátıjelerin kórip otyrmyz. Baıqaý kezinde qatysýshylardy jumysqa qabyldaý týraly usynystar jasaldy. ıAǵnı, bul tek jarys emes, jastardyń kásibı jolyn bastaýǵa baǵyttalǵan alań, - dedi Dáýirjan Jumahan.
Ol sondaı-aq jobanyń qaladaǵy orta arnaýly oqý oryndarymen seriktestik tájirıbesin kúsheıtkenin jetkizdi.
Baıqaýǵa qatysýshylardyń biri - kólik jóndeý slesari Samın Ismaılov tehnıkalyq saladaǵy alǵashqy tájirıbesin kórsetýdi maqsat etken.
- Kolledjdegi ustazdarym úıretken bilim men mashyqty dál osy jerde kórsetýge keldim. Bolashaqta osy mamandyq boıynsha jumys istegim keledi, tájirıbemdi tereńdetkim keledi, - dedi ol.
Tehnıkalyq talaptardy qadaǵalaǵan qazylar alqasy jumystyń sapasyna erekshe nazar aýdardy. Olardyń biri - TirePro Astana fılıalynyń dırektory jáne Caspian Automotive kompanııasynyń bólim basshysy Qarlyǵash Qudaıberlıeva.
- Jastarǵa qoldaýdyń mundaı túri óte mańyzdy. Teorııany jaqsy meńgergen maman tájirıbede birden erekshelenedi. Eń basty krıterıı - sapa men jyldamdyqtyń úılesýi. Dóńgelek jóndeýde jıi kezdesetin qatelik – datchık nemese dıskini zaqymdaý. Uqyptylyq pen tehnıkany durys paıdalaný - basty talap, - dedi ol.
Sarapshynyń aıtýynsha, jol qaýipsizdigi mamannyń kásibı biliktiligimen tikeleı baılanysty.
- Bul - qazirgi tańda suranysy joǵary kásip. Tehnıkamen jumys isteı alatyn, úırenýge yntasy bar maman mindetti túrde óz ornyn tabady. Osyndaı konkýrstar jastardyń qyzyǵýshylyǵyn oıatyp, salanyń damýyna serpin beredi, - dep qorytyndylady Qudaıberlıeva.
Baıqaý jastar arasynda tehnıkalyq mamandyqtarǵa degen qyzyǵýshylyqty arttyryp qana qoımaı, jumysshy mamandyqtardyń qoǵamdaǵy rólin qaıta baǵalaýǵa múmkindik beredi. Uıymdastyrýshylardyń aıtýynsha, joba aldaǵy jyldary da jalǵasyn taýyp, jańa baǵyttarmen tolyqpaq.
Aıta keteıik, buǵan deıin Jumysshy mamandyqtar jylyna oraı X Respýblıkalyq WorldSkills Kazakhstan 2025 chempıonaty ótetinin jazǵan edik.