Astanada jumys izdeýshilerge qandaı múmkindikter bar
ASTANA. KAZINFORM — Elordada jumys izdeýshilerge arnalǵan birqatar qoldaý sharasy iske asyrylyp jatyr. Bul týraly Astana qalasy ákimdiginiń «Eńbek mobıldiligi ortalyǵy» KMM dırektory Omar Oljas málimdedi.
Onyń aıtýynsha, qalada jumyspen qamtý múmkindikterin keńeıtýge baǵyttalǵan baǵdarlamalar halyqtyń ártúrli sanatyn qamtyp otyr.
— Jastardy qoldaý úshin «Jastar praktıkasy» baǵdarlamasy júzege asyrylyp jatyr. Baǵdarlama joǵary jáne tehnıkalyq, kásiptik bilim berý uıymdarynyń túlekterine, sondaı-aq jumys tájirıbesi joq azamattarǵa arnalǵan, — dedi ol.
Oqýyn aıaqtaǵan azamattar baǵdarlamaǵa 5 jyl ishinde qatysa alady. Praktıka 12 aıǵa deıin jalǵasady jáne bul ýaqyt eńbek ótiline esepteledi.
— Qatysýshylarǵa 30 aılyq eseptik kórsetkish kóleminde jalaqy tólenedi. 2026 jyly bul 129 750 teńgeni quraıdy, — dedi ortalyq basshysy.
Sonymen qatar zeınetaldy jastaǵy azamattarǵa arnalǵan «Kúmis jas» jobasy da iske asyrylyp jatyr.
— Atalǵan baǵdarlama 50 jastan asqan azamattardy 36 aıǵa deıin jumyspen qamtýdy kózdeıdi jáne turaqty tabys tabýyna múmkindik beredi. Sonymen qatar ýaqytsha jumys izdegenderge qoǵamdyq jáne áleýmettik jumys oryndary usynylady. Bul jumystarǵa qatysqandarǵa 24 AEK kóleminde jalaqy tólenedi (2026 jyly — 103 800 teńge), al qatysý merzimi 12 aıǵa deıin, — dedi ol.
Aıta keteıik, elordada 7,5 myńnan astam jańa jumys orny ashyldy.
