Astanada jumys berýshiler qajetti mamandardy daıarlaýǵa ótinim bere alady

ASTANA. KAZINFORM – Elordada mamandardy qysqa merzimde daıarlap shyǵaratyn mobıldi ortalyq jumys isteıdi. Ortalyqta qandaı mamandardy daıarlaıdy? Tolyǵyraq Astana qalasy ákimdiginiń «Eńbek mobıldiligi ortalyǵy» KMM dırektory Oljas Omar aıtyp berdi. 

«Bıyl elordada 210 adamdy qysqa merzimde oqytýdy josparlap otyrmyz. Qazir 100-ge jýyq adam oqyp jatyr. Osy oraıda jumys berýshilerge habarlandyrý, ótinim berseńizder, biz mamandardy daıarlaýǵa daıynbyz. Óıtkeni, qysqa merzimde oqytý jumys berýshilerdiń tapsyrysy boıynsha júzege asyrylady. Búginde bizdiń ortalyqta tiginshi, aspaz, shashtaraz, manıkıýr sheberi, tárbıeshiniń kómekshisi, elektrık, elektro gazben dánekerleýshi mamandary oqytyldy», - dedi Oljas Omar Astana qalasynyń kommýnıkatsııalar qyzmeti alańynda ótken baspasóz máslıhatynda.

Ortalyq basshysynyń aıtýynsha, qysqa merzimdi kýrstan ótkenderge 32 myń teńge shákirtaqy beriledi.

«Odan bólek, medıtsınalyq tekserýden ótýge 7 myń teńge materıaldyq kómek bar. Al eger oqytý jumys berýshiniń mekemesinde uıymdastyrylsa, qatysýshyǵa 73 myń teńge jalaqy tólenedi. Sonymen qatar oqýdy aıaqtaǵan soń qatysýshyǵa sertıfıkat jáne turaqty jumysqa ornalasýǵa kepildik beriledi», - deıdi ol.

Qosymsha suraqtar boıynsha Astana qalasy, Beıbitshilik kóshesi, 9 mekenjaıyndaǵy «Mansap» ortalyǵynan nemese 24-89-48, 24-93-09 telefon nómiri arqyly jaýap alýǵa bolady.