Astanada Jumabek Táshenovtyń 100 jyldyǵyn atap ótti
ASTANA. QazAqparat - Astana qalasynyń №10 orta mektebi ǵımaratynda Astana qalasy Tilderdi damytý basqarmasynyń uıymdastyrýymen belgili qoǵam jáne memleket qaıratkeri Jumabek Táshenovtyń 100 jyldyq mereıtoıy atalyp ótti, dep habarlady qalalyq ákimdiktiń baspasóz qyzmetinen.
Atalǵan sharaǵa UOS ardagerleri, zııaly qaýym, QR Parlamenti Májilisiniń depýtattary, jastar uıymdarynyń belsendileri, elordalyq stýdentter men qala turǵyndary qatysty. J. Táshenov ómirin zertteýshi Meıram Baıǵazın jıylǵan qaýymǵa qaıratker týraly baıandama jasady. - Jumabek Táshenov - QazKSR Mınıstrler keńesiniń tóraǵasy bolyp turǵanynda elimizdiń shekaralaryn batyl saqtap qalǵan biregeı tulǵa. Onyń bedeli joǵary edi. Eń bastysy Táshenov qandaı qyzmette júrse de, qandaı bıikterge kóterilse de, adamı qundylyqtaryn joǵaltpaǵan, buqara qamyn árdaıym oılaı biletin qarapaıym adam bolǵan, - deıdi Meıram Baıǵazın. Aıta keteıik, 1999 jyldyń 25 mamyrynda Astana qalasy máslıhatynyń sheshimimen elordadaǵy Polevaıa kóshesine Jumabek Táshenovtyń esimi berilgen bolatyn. Odan ózge, Almaty, Kókshetaý, Shymkent qalalarynda da qaıratkerdiń atyndaǵy kósheler bar.
