Astanada «Juldyzdarǵa jol tartý» kórmesi ashyldy
ASTANA. 25 naýryz. QazAqparat /Aınur Kenebaeva/ - Búgin QR Tuńǵysh Prezıdenti murajaıynda adamzat balasynyń ǵaryshqa alǵash ret sapar shegýine 50 jyl tolýyna oraılastyrylǵan «Juldyzdarǵa jol tartý» kórmesiniń saltanatty ashylýy bolyp ótti.
Elimizde ótip jatqan «Juldyzdarǵa jol tartý» kórmesi adamzattyń ǵaryshqa samǵaýyna 50 jyl tolýy aıasynda ótkiziletin «Juldyzdy odısseıa» atty álemdik mereıtoılyq sharalar kesheniniń alǵashqy ashylýy bolyp otyr.
Sharanyń ashylý saltanatyna qazaq eliniń tuńǵysh ǵaryshkeri Toqtar Áýbákirov jáne Reseı ǵaryshkeri ıÝrıı Malenchenko qatysty.
Kórmege álemdik jáne keńestik ǵaryshtyń damýyna Qazaqstannyń qosqan úlesin aıǵaqtaıtyn muraǵattyq materıaldar men ıÝ. Gagarın, T. Áýbákirov, T. Musabaevtyń jeke muraǵaty qorynan alynǵan jádigerler, qujattar qoıylǵan.
Sonymen qatar Baıqońyr ǵarysh aılaǵynyń tarıhı mańyzymen tanystyratyn derekti materıaldar, ǵaryshkerlerdiń kıimderi men ǵaryshta tutynatyn azyq-túlik zattary jáne Aqtóbe jáne Soltústik Qazaqstan oblystarynyń tarıhı-ólketaný murajaıynyń muraǵattary jurtshylyq nazaryna pash etildi.
«Adamnyń ǵaryshqa alǵash ret sapar shegýine 50 jyl tolýy - adamzat balasynyń damý tarıhyndaǵy aıtýly oqıǵa. Bul oqıǵa qazaq dalasymen, Baıqońyrmen baılanysty. Ǵaryshty alǵash ıgerý qazaq dalasynan bastaý aldy, ǵaryshqa taban tiregen birinshi tulǵa da kóne saq dalasynan samǵap ushty, sondyqtan bul aıtýly oqıǵada barlyq qazaqstandyqtardyń úlesi bar», - dedi sharanyń ashylý saltanatynda quttyqtaý sóz sóılegen Toqtar Áýbákirov.
«Juldyzdarǵa jol tartý» kórmesi 20 sáýirge deıin jalǵaspaq.
