Astanada júktilik boıynsha demalysqa aqy tóleýdiń sharttaryn ózgertý týraly kelisimge qol qoıyldy
ASTANA. 27 aqpan. QazAqparat - Búgin Astana qalasynyń ákimdiginde qala ákiminiń orynbasary Aıda Balaevanyń tóraǵalyǵymen áleýmettik seriktestik, áleýmettik jáne eńbek qatynastaryn retteý jónindegi qalalyq úshjaqty komıssııanyń kezekten tys otyrysy ótti. Naqtyraq aıtsaq, 2012-2014 jyldarǵa Kelisim ákimdik, kásipodaq komıteti men Astana qalasynyń jumys berýshiler birlestikteri arasynda jasaldy.
Bul týraly elordanyń resmı saıtynan habarlady.
2013 jylǵy 25 aqpandaǵy Úshjaqty kelisim komıssııasynyń otyrysynda júktiligi men bosanýy, bala asyrap alýy jónindegi demalysyna aqy tóleýdiń áleýmettik mańyzyn eskere otyryp, ІV taraýyna ózgerister engizýdi sheshti: onda «QR mindetti áleýmettik saqtandyrý týraly zańnamasyna sáıkes júzege asyrylatyn eńbek jáne (nemese) ujymdyq sharttarǵa, jumys berýshilerdiń aktilerine júktiligi jáne bosanýyna, jańa týǵan balany (balalardy) asyrap alýǵa baılanysty tabysynan aıyrylǵan jaǵdaılarda áleýmettik tólemderdi shegerip ortasha eńbekaqysy saqtala otyryp, júktiligi jáne bosanýyna, jańa týǵan balany (balalardy) asyrap alý boıynsha demalys tólemi týraly sharttar engizilsin» delingen.
Al Astana qalasy Jumyspen qamtý jáne áleýmettik baǵdarlamalar basqarmasy Eńbek naryǵyn taldaý jáne áleýmettik baǵdarlamalar bóliminiń bastyǵy Aıgúl Talasovanyń aıtýynsha, qabyldanǵan kelisim boıynsha budan bylaı eńbek demalysyna shyqqan áıelderge memleket tarapynan ǵana emes, jumys berýshi tarapynan da járdemaqy tólenetin bolady. Aıta ketý kerek, memleket eń tómengi jalaqy kórsetkishiniń on eselengen somasyn tóleıtin bolady, al, járdemaqynyń qalǵany jumys berýshi tarapynan tólenedi.
