Astanada júkti kelinshegin soqqyǵa jyqqan er adam 15 táýlikke qamaldy
NUR-SULTAN. QazAqparat – Elordada alkogoldik ishimdikke toıyp alyp, tóbeles shyǵarǵan er adam 15 táýlikke qamaýǵa alyndy, dep habarlaıdy QazAqparat Nur-Sultan qalasy polıtsııa departamentine silteme jasap.
«36 jastaǵy er adam áıeliniń jumystan ýaqytyly shyqpaǵany úshin janjal shyǵardy. Zaıyby jumystan 15 mınýt keshigip shyqqan. Úıge bara jatqan kezde kúıeýi ony qorqytyp, balaǵattaǵan. Alaıda janjal osymen aıaqtalmaı, úıge jetkende, er adam kelinshegin bir soǵyp, úıden ketip qalǵan. Tańǵy 05.00-de úıge oralyp, áıeliniń aıaǵy aýyr ekenine qaramastan ony soqqyǵa jyqqan. Arashalaýǵa tyrysqan enesi de taıaq jedi. Egde jastaǵy áıel polıtsııanyń ýchaskelik ınspektorynan kómek surady», - dep baıandady PD baspasóz qyzmetinen.
Ýchaskelik ınspektor oqıǵa ornyna birden kelip jetti. Ol ishimdikke sylqııa toıǵan er adamnyń agressııalyq áreketin toqtatty.
Janjalqoı er adamǵa qatysty ákimshilik óndiris qozǵaldy. Budan basqa, onyń tártibine bir jylǵa erekshe talap ornatylǵan.
Sot sheshimimen, er adam 15 táýlikke qamaýǵa alyndy.
35 jastaǵy áıel Esil aýdandyq polıtsııa basqarmasynyń ýchaskelik ınspektory Nurlan Moldabekovke ýaqytyly kórsetken kómegi úshin alǵysyn jetkizdi.
