Astanada júkti áıeldiń ólimine sebepker bolǵan eki dáriger sottaldy
ASTANA. QazAqparat - Astanada Almaty aýdanynyń №2 soty QR QK 114-babynyń 4-bólimi boıynsha aıyptalǵan K. jáne A. atty dárigerlerge qatysty qylmystyq isti qarady.
«Sot talqylaýy barysynda 2014 jylǵy 9 sáýirde azamatsha N. júktiligi boıynsha baqylaýda bolǵan jerde esepke turady. Júktilik qandaı da bir asqynýlarsyz ótken. 4.11.2014 j. kesir tiligi jasalady. Sodan keıin áıel jansaqtaý bólimine jatqyzylady. Ony otadan keıin anestezıolog dáriger A. men kezekshi dáriger akýsher-gınekolog K. baqylaýǵa alǵan», - dedi sot baspasóz qyzmetinen.
Sot derekterine sáıkes, dárigerler mindetterin tıisti oryndamaýy saldarynan reanımatsııalyq jáne qarqyndy terapııa bólimshesi kezeńinde klınıkalyq derekterdi durys taldamaǵan. Bul naýqastan qan ketýin kesh baıqaýǵa alyp kelgen. 5.11.2014 kúni N-ǵa qan toqtatý boıynsha ota jasalady, alaıda kesh jasaǵan ota esh nátıje bermeı, áıel qaıtys bolady.
«Sarapshy qorytyndysyna sáıkes, anestezıolog dáriger A. men kezekshi dáriger akýsher-gınekolog K. jol bergen N. esimdi azamatshanyń ólimine alyp kelgen medıtsınalyq kómek kórsetýdegi salǵyrttyq densaýlyqqa aýyr zııan tıgizgen. Sot sheshimimen olarǵa QR QK 114-baby 4-bólimine sáıkes aıyp taǵylyp, 2 jylǵa deıin dárigerlik qyzmette jumys isteý quqyǵynan aıyra otyryp, bir jyl merzimge bas bostandyǵynan aıyrý jazasy taǵaıyndaldy», - delingen habarlamada.
Úkim zańdy kúshine engen joq.
