Astanada júkti áıelderdiń ólimin sarapshylar tekserip jatyr
ASTANA. QazAqparat - Astana qoǵamdyq densaýlyq saqtaý departamentiniń basshysy Sádýaqas Baıǵabylov qazan aıynyń sońynda jáne qarashanyń basynda júkti áıelderdiń kóz jumýyna qatysty túsinik berdi, dep habarlaıdy QazAqparat tilshisi.
«Qazirgi kezde, ústimizdegi jyldyń 31 qazany men 4 qarashasynda aýrýhanada jáne úıinde kóz jumǵan kelinshekterdiń ólimin tekserýdi uıymdastyrý sharalary júrgizilip jatyr. Saraptama nátıjelerine qaraı medıtsına qyzmetkerleriniń kórsetken kómeginiń sapasyna baǵa beriledi. Odan ári materıaldar tergeý organdaryna jiberiledi», - dedi S. Baıǵabylov.
Budan buryn, 31 qazan jáne 4 qarasha kúnderi Astanada eki júkti áıeldiń qaıtys bolǵanyn habarlaǵan edik.
Eske sala keteıik, 21 maýsym kúni №1 perınataldyq ortalyqta júkti kelinshek qaıtys bolǵan. 25 maýsym, 2 shilde kúnderi taǵy eki áıel kóz jumǵan. 16 shildede №2 perınataldyq ortalyqta taǵy biri baqılyq boldy. 1 qyrkúıekte jyl basynan bergi besinshi qaıǵyly oqıǵa tirkeldi.
