Astanada júkti áıel perınataldyq ortalyqtyń edenine bosanyp qalǵan
ASTANA. QazAqparat - Astanadaǵy №2 perınataldyq ortalyqta akýsherlerden kómek bolmaǵan júkti áıel edenge bosanyp qalǵan. Oqıǵa týraly ákimdikte ótken otyrysta elorda basshysy Baqyt Sultanov aıtty, dep habarlaıdy QazAqparat.
Ákimniń sózine qaraǵanda, oqıǵa №2 perınataldyq ortalyqta 19 aqpan kúni bolǵan. Ortalyqtyń bosaný bóliminde kelinshek dárigerlerdiń kómeginsiz, ózi edenge bosanǵan.
«Abyroı bolǵanda bala men ananyń densaýlyǵyna zııan kelmegen. Biraq, bul jaǵdaı erekshe baqylaýǵa alynýy tıis dep oılaımyn. Mundaı oqıǵalar júıesizdiktiń saldarynan oryn alǵan», - dedi B.Sultanov.
Sonymen qatar, ol 2018 jyly bosaný kezinde segiz áıeldiń qaıtys bolǵanyn, oqıǵalar sanynyń 2017 jylǵy kórsetkishten tórt ese joǵary ekendigin alǵa tartty.
«Bizdiń densaýlyq saqtaý júıesinde mundaı bylyqtar nelikten oryn alýda?»- dep surady ákim Qoǵamdyq densaýlyq saqtaý basqarmasy basshysynyń mindetin atqarýshy Álııa Rústemovadan.
«Mundaı jaǵdaıdyń oryn alǵany, ras. Júkti áıel 18 aqpanda kelip tústi. 19 aqpanda onyń tolǵaǵy kúsheıe bastaǵan. Saǵat 12-de bólimshe meńgerýshisi ony qaraǵanda, ol bosaný bólimshesinde bolǵan. Ol jyldam bosandy. Bul kúni bólimshede 37 áıel týdy. Osy ýaqytta úsh akýsher tórt áıeldi bosandyryp jatqan bolatyn. Sondaı-aq, barlyq dárigerlerdiń qatysýymen operatsııa jasalyp jatty. Ne desekte, bul jaǵdaıda olqylyqtar bar», - dep jaýap berdi ol.
Osy rette, qala basshysy Á.Rústemovaǵa resmı eskertý jasaıtynyn aıtty.
«Demek, tıisti kúsh salý kerek. Sizge resmı túrde eskertý jasap otyrmyn. Barlyq júıe boıynsha sharalar qoldanyńyz. Bul barlyq basqa medıtsınalyq mekemeler úshin belgi bolýy tıis. Sondaı-aq, barlyq densaýlyq saqtaý nysandarynyń jumysyna monıtorıng júrgizip, shtattan tys barlyq jaǵdaılar boıynsha naqty is-qımyl algorıtmin pysyqtańyz», - dep tapsyrdy B.Sultanov.
Aıta keteıik, ákimdikte ótken atalmysh otyrys barysynda elorda basshysy Baqyt Sultanov, sondaı-aq jýyrda oqýshy balanyń qudyqqa qulap, mert bolýyna baılanysty jaýapty tulǵalarǵa qatań sógis jarııalady.
