Astanada juqpaly aýrýlar órship tur
ASTANA. QazAqparat - Densaýlyq saqtaý basqarmasy Astana turǵyndaryna juqpaly ınfektsııalar boıynsha shaqyrýlardyń ulǵaıǵanyn eskertedi. Qalalyq ákimdiktiń baspasóz qyzmetiniń habarlaýynsha, jedel járdem shaqyrý sany táýligine 2000-nan 3500-ge deıin ósken, dep habarlaıdy vedomstvo ókilderi..
Qalalyq stantsııanyń barlyq 84 brıgadasy jáne emhana mamandarynan qurylǵan 17 brıgada jumysqa tartyldy. Bıylǵy jyldyń 15 jeltoqsanynan bastap, balalar statsıonarynyń qabyldaý bólimderinde emhana pedıatrlarynyń qabyldaý sany artty.
«Basqarma qalyptasqan jaǵdaıǵa túsinistikpen qaraýdy suraıdy jáne tómendegi aldyn alý sharalaryn eske salady: 1. ÓRJI/tumaýdyń alǵashqy belgileri paıda bolsa, dárigerge júginip, vırýsqa qarsy preparattar taǵaıyndaý. 2. Temperatýra 38 gradýstan joǵarylasa, quramynda paratsetamol, ıbýprofen bar qyzý túsiretin preparattar qabyldaý. 3. Jyly sýsyndardy kóbirek ishý. 4. Naýqas jatqan bólmeni jıi jeldetip, ylǵal shúberekpen súrtip turý. 5. Naýqastar men olardy kútýshilerdiń qoldy jıi jýyp, antıseptıkter qoldanýy. 6. Bir rettik betperde kııý jáne ár 4 saǵat saıyn aýystyryp turý. 7. Ózgelerge ınfektsııa juqtyrmaý úshin naýqastarǵa qoǵamdyq oryndarǵa, jumysqa, sabaqqa barýǵa tyıym salý. 8. Ózdiginen emdeýmen aınalyspaý», - delingen habarlamada.
