Astanada JRVI jaǵdaılary ótken maýsymmen salystyrǵanda 14%-ǵa artty

ASTANA. KAZINFORM – 2024-2025 jylǵy epıdemıologııalyq maýsymda elordada jiti respıratorlyq vırýstyq ınfektsııanyń (JRVI) 260 myńnan astam jaǵdaıy tirkeldi. Bul ótken maýsymdaǵy kórsetkishten 14%-ǵa joǵary. Bul týraly Astana qalasy sanıtarııalyq-epıdemıologııalyq baqylaý departamentiniń basshysy Aıgúl Qoshmuhambetqyzy Shaǵaltaeva málimdedi.

Aıgúl Shaǵaltaevanyń aıtýynsha, naýqastardyń jartysynan kóbi – 14 jasqa deıingi balalar.

Olardyń úlesi 51,6%-dy qurap otyr. Bul ótken jylǵy maýsymmen salystyrǵanda 8%-ǵa artyq. 2023-2024 jyldary 126 myńnan astam jaǵdaı tirkelgen bolatyn.

– Tek 2025 jyldyń 36-shy aptasynda JRVI-diń 4638 jaǵdaıy anyqtaldy. Onyń ishinde balalardyń úlesi 50,1%-dy qurady. Ótken maýsymnyń dál osy kezeńimen salystyrǵanda syrqattanýshylyq 39%-ǵa tómendegen, – dedi spıker.

Sonymen qatar ol óz sózinde, qalada JRVI, tumaý jáne COVID-19 boıynsha epıdemıologııalyq jáne zerthanalyq qadaǵalaý júıesi jumys isteıtinin aıty. 

– Ol №5, 7, 8 emhanalarda, «Shıpager» OKJ-de, №1 jáne №3 kópbeıindi qalalyq balalar aýrýhanalarynda, QIO men №3 kópbeıindi qalalyq aýrýhanada uıymdastyrylǵan, - dedi ol.

Ótken maýsymda Ulttyq saraptama ortalyǵynyń fılıaly PTR ádisimen 1889 synamany zerttelgenin aıtty

– Ambýlatorııalyq patsıentterden – 258, aýrýhanaǵa jatqyzylǵandardan – 1631 synama alyndy. Zertteý nátıjesinde tumaýdyń oń túri 29% jaǵdaıda anyqtaldy (onyń ishinde A tıpi – 56%, V tıpi – 44%). Sondaı-aq COVID-19 úlesi – 4,6%-dy qurady. Qalǵan jaǵdaılarda basqa vırýstar tirkeldi: rınovırýs (32%), paragrıpp (10%), maýsymdyq koronavırýs (6%), adenovırýs (7%), metapnevmovırýs (11%), bokavırýs (2%) jáne aralas ınfektsııalar (27%), – dedi maman. 

Buǵan deıin Densaýlyq saqtaý mınıstrligi eldegi JRVI jáne tumaý statıstıkasyn jarııalaǵan bolatyn.