Astanada JRVI men tumaýdyń aldyn alý úshin qandaı sharalar qabyldanyp jatyr

ASTANA. KAZINFORM – Elordada jedel respıratorlyq vırýstyq ınfektsııalar boıynsha epıdemıologııalyq jaǵdaı turaqty. Qalanyń medıtsınalyq uıymdary ınfektsııalardyń taralýyna jol bermeý jáne turǵyndarǵa ýaqytyly kómek kórsetý úshin qajetti sharalardy qabyldap jatyr, dep habarlady Astana qalasynyń ákimdigi.

v
Foto: Astana ákimdigi

Qazirgi ýaqytta elordada 2026-2027 jyldardaǵy epıdemıologııalyq maýsym aıasynda JRVI men tumaýdyń taralýyna turaqty monıtorıng júrgizilip jatyr.

Tynys alý joldarynyń ınfektsııalyq belgileri bar turǵyndardy qabyldaý úshin qalalyq medıtsınalyq uıymdarda súzgi kabınetteri men shuǵyl kómek kórsetý kabınetteri jumys isteıdi. Munda naýqastar medıtsınalyq tekserýden ótip, qajetti kómek ala alady.

Atalǵan kabınetter jumys kúnderi saǵat 08:00-den 20:00-ge deıin, al demalys jáne mereke kúnderi 08:00-den 18:00-ge deıin qyzmet kórsetedi.

– Tumaýdyń aldyn alýdyń negizgi tásilderiniń biri – vaktsınatsııa. Qalalyq Qoǵamdyq densaýlyq saqtaý basqarmasy turǵyndarǵa JRVI men tumaýdan saqtaný úshin birqatar profılaktıkalyq sharalardy ustanýdy usynady. Atap aıtqanda, qoldy jıi jýý, bólmeni únemi jeldetý, aýrý belgileri bar adamdarmen baılanystan múmkindiginshe aýlaq bolý jáne óz betinshe emdelmeý qajet. Al tynys alý joldary ınfektsııasynyń alǵashqy belgileri baıqalǵan jaǵdaıda medıtsınalyq kómekke ýaqytyly júginý usynylady, – delingen ákimdik aqparatynda.

Aıta keteıik, buǵan deıin Astanada 2026-2027 jyldardaǵy tumaý maýsymyna daıyndyq aıasynda «Grıppol Plıýs» vaktsınasynyń 169 005 dozasy satyp alynǵany habarlanǵan edi. Ekpe elordadaǵy 41 alǵashqy medıtsınalyq-sanıtarııalyq kómek uıymynda qoljetimdi.