Astanada JRVI-men aýyrǵan balalardyń 97%-y ekpe almaǵan
ASTANA. KAZINFORM – Elordanyń Balalar juqpaly aýrýlar aýrýhanasynda búginde 300-ge jýyq naýqas bala em alýda, onyń 100-den astamy jedel respıratorlyq vırýstyq ınfektsııamen emdelip jatyr. Asqynýlary bar naýqastardyń kópshiligi vaktsınatsııalanbaǵan. Bul týraly ÓKQ brıfınginde qalalyq qoǵamdyq densaýlyq saqtaý basqarmasy basshysynyń orynbasary Gúlnaz Dosmyrzaeva málimdedi, dep habarlaıdy Astana ákimdiginiń resmı saıty.
Naýqas balalar arasynda ókpeniń qabynýy kóptep kezdesedi, asqynǵan túri tirkelmegen. Bul sondaı-aq halyq arasynda vaktsınatsııalaýdyń arqasynda, ekenin atap ótti qalalyq densaýlyq saqtaý basqarmasynyń ókili.
«Aıta ketý kerek, statsıonarǵa túsken balalardyń 97 paıyzdan astamy vaktsınatsııalanbaǵan. Kóbinese olar asqynýlarmen, ıaǵnı entigýmen nemese qurysýlarmen keledi. Joǵaryda atalǵan barlyq kórsetkishter halyqty juqpaly aýrýlarǵa qarsy ımmýndaýdyń aýrýdyń aldyn alýda mańyzdy ról atqaratynynyń dáleli», - dedi Dosmyrzaeva.
Ol JRVI jáne tumaýmen aýyratyn naýqastarǵa medıtsınalyq kómek kórsetý úshin emhanalarda jumys kúnderi saǵat 08.00-den 20.00-ge deıin súzgi kabınetteri jumys isteıtinin eske saldy.
Sonymen qatar ulttyq kúntizbe boıynsha qalalyq emhanalardyń egý kabınetterinde vaktsınamen basqarylatyn ınfektsııalarǵa qarsy josparly vaktsınatsııa júrgiziledi.
Qoǵamdyq densaýlyq saqtaý basqarmasynyń ókili elorda turǵyndaryn óz densaýlyǵy men balalarynyń densaýlyǵyna uqypty qaraýǵa, sondaı-aq vaktsınamen basqarylatyn ınfektsııalarmen aýrýlardyń aldyn alý úshin vaktsınatsııa alýǵa shaqyrdy.
