Astanada Joshy ulysy men qazaq tarıhyna arnalǵan halyqaralyq konferentsııa ótip jatyr
ASTANA. KAZINFORM – Astanadaǵy Memlekettik áskerı-tarıhı mýzeıde «Qazaq memlekettiliginiń bastaýy - Joshy hannan qazirgi zamanǵa deıin» atty halyqaralyq ǵylymı-tájirıbelik konferentsııa ótip jatyr.
Ulttyq qorǵanys ýnıversıtetiniń uıymdastyrýymen ótip jatqan is-sharaǵa Qazaqstan men kórshi elderdiń ǵalymdary, Parlament depýtattary, QR Qarýly kúshteri men ózge de áskerı qurylymdardyń basshylary, ardagerler men jas áskerıler shaqyrylǵan. Konferentsııanyń ashylýynda sóz alǵan ýnıversıtet bastyǵy Asqar Mustabekov
«Búgingi konferentsııa arqyly Joshy ulysynyń qazaq tarıhyna, onyń memleket retinde qalyptasýyna tıgizgen áseri týraly ǵylymı derekterdi áskerı sala ókilderiniń sanasyna sińirsek degen de maqsatymyz bar. Konferentsııanyń qorytyndysy boıynsha Joshy ulysy men qazaq memlekettiliginiń arasyndaǵy baılanys týraly úlken bir jınaq ómirge keledi degen josparymyz bar. Ol jınaq jalpy oqyrmanǵa arnalady», - dedi ol.
Eske salsaq, Joshy ulysynyń 800 jyldyǵyna arnalǵan konferentsııalardyń birinde Súleımenov atyndaǵy Shyǵystaný ınstıtýtynyń dırektory Dúken Másimhanuly Shyńǵys han men Joshy ulysy bolmaǵanda Orta Azııa halqy arab-parsy tildi bolýy múmkin edi degen pikir aıtqan bolatyn.
«Biz úshin Shyńǵys hannyń eńbegi – bizdiń osy uly dalada túrki halyqtary retinde qalyptasýymyzǵa, túrki halyqtary retinde memleket qurýymyzǵa negiz salyp berdi. Ásirese, Shyńǵys hannyń eki ulynan taraǵan Joshy ulysy men Shaǵataı handyǵy bizdiń búgingi túrki halyqtarynyń memleket bolýyna negiz qalap berdi», - degen edi tarıhshy.
