Astanada JOO stýdentteri arasynda «Úsh tuǵyrly til» atty baıqaý ótip jatyr
ASTANA. Qyrkúıektiń 23-i. QazAqparat /Gúlmıra Álıakparova/ - Keshe, Astanadaǵy S.Seıfýllın atyndaǵy Qazaq agrotehnıkalyq ýnıversıtetinde Qazaqstan halqy tilderiniń merekesin atap ótý aıasynda «Úsh tuǵyrly til» qalalyq baıqaýy bastaldy.
Baıqaý, elordanyń joǵary oqý oryndarynda tildik emes mamandyqtar boıynsha bilim nárine sýsyndap júrgen stýdentter men magıstranttar arasynda ótýde. Barlyǵy - 51 qatysýshy.
Sharany uıymdastyrýshy Qazaq agrotehnıkalyq ýnıversıtetiniń Gýmanıtarlyq kafedralar bólimi.
Aǵylshyn jáne frantsýz tilderi kafedrasynyń aǵa oqytýshysy Maǵrıshat Baıǵoshqarovanyń aıtýynsha, baıqaý qazaq, orys jáne aǵylshyn, bolmasa frantsýz, nemis tilderin birdeı jetik meńgergen jastardyń arasynda ótip jatyr.
Úshkúndik baıqaýdyń alǵashqy kúninde olar «Qazaqstannyń EQYU tóraǵasy retindegi róli» taqyrybynda úsh tilde esse jazdy. Al búgin tosynnan qoıylǵan suraqtarǵa úsh tilde jaýap beretin bolady. Olardyń árqaısysy «Qazaqstanda úshtuǵyrly tildiń mańyzy qandaı?» degen mindetti suraqqa jáne de «Qazaqstan halyqtarynyń salt-dástúrleri»; «Qazaqstan Respýblıkasynyń nyshandary», «Qazaqstan jastarynyń problemasy»; «7-shi Qysqy Azııa oıyndary Qazaqstanda» syndy saýaldarǵa óz pikirlerin bildiredi.
Baıqaýdyń úshinshi kúninde júldeli oryndarǵa «talasqan» qatysýshylardyń arasynda qosymsha saıystar ótkiziledi - bir tilden ekinshi tilge mátinderdi aýdarý.
«Qazaqstan halqy tilderiniń aıasynda túrli baıqaýlar ýnıversıtet qabyrǵasynda sońǵy bes jylda turaqty túrde ótkizilip keledi. «Úsh tuǵyrly» qoǵam qalyptastyrý saıasatyn júzege asyrý maqsatyndaǵy eńbekterimizdiń jemisin kórý úshin bıyl baıqaýdy qalalyq deńgeıde uıymdastyrýdy jón kórdik», - deıdi M.Baıǵoshqarova.
Baıqaý sońynda barlyq qatysýshylar dıplomdarmen marapattalady, al júzden júırik shyqqan úsh jeńimpaz qomaqty qarjylaı syıaqyǵa ıe bolmaq. Sonymen birge, «Eń myqty polıglotqa» arnaıy dıplom tabys etiledi.
