Astanada JOO prorektory sot arqyly qyzmetine qaıta keldi
ASTANA. QazAqparat - Astanadaǵy joǵary oqý oryndarynyń birinde prorektor sot arqyly qyzmetine qaıta taǵaıyndalyp, 1 mln teńge kóleminde jalaqy qaryzyn óndirip aldy. Bul týraly elorda sotynyń baspasóz qyzmetinen málim etti, dep habarlaıdy QazAqparat.
Málim bolǵandaı, azamat K. ýnıversıtettegi laýazymyn qalpyna keltirý jáne jumysta májbúrli túrde bolmaǵan ýaqyt aralyǵyndaǵy eńbekaqysyn qaıtarý týraly Astana qalasynyń Esil aýdandyq sotyna júgingen.
«2014 jyldyń 19 maýsymyndaǵy Eńbek kelisimshartyna sáıkes aryz berýshi ýnıversıtette ǵylymı jumystar jónindegi prorektor qyzmetinde 2017 jyldyń 23 shildesine deıin bolǵan. Keıin, qosymsha kelisimmen Eńbek kelisimshartynyń merzimi 2017 jyldyń 1 qarashasyna deıin ózgertilgen. Alaıda, osy jyldyń 13 qazany kúni ol kelisimshart merziminiń aıaqtalýyna oraı jumystan bosatylǵan», - delingen taratylǵan habarlamada.
Sotta anyqtalǵandaı, aryzdanýshy Eńbek kelisimshartyna qosymsha kelisimge qol qoımaǵan. Sebebi ol ýaqytta shetelde bolǵan.
«Onymen qosa, qoltańbaǵa júrgizilgen sot saraptamasy qosymsha kelisimge aryzdanýshynyń atynan ózge tulǵanyń qol qoıǵany anyqtaldy. Sot sheshimimen prorektordy jumystan shyǵarý týraly buıryqtar kúshin joıyp, jumysta májbúrli bolmaǵan ýaqyt kezeńindegi 1 mln teńgege jýyq jalaqy qaryzy óndirip alyndy», - dep atap ótti sottyń baspasóz qyzmetinen.
Úkim zańdy kúshine endi.
