Astanada jóndeýge baılanysty úsh kóshede jol jabylady
ASTANA. QazAqparat – Astanada taǵy úsh kóshede jóndeý jumystary júrip jatyr. Osyǵan baılanysty kólik qozǵalysyna ýaqytsha shekteý qoıylady, dep habarlaıdy QazAqparat qala ákimdiginiń saıtyna silteme jasap.
Atap aıtqanda, Ardagerler kóshesinde asfaltbeton jabynynyń joǵarǵy qabaty tóselýde. Osyǵan baılanysty 21-23 mamyr aralyǵynda Almalyq kóshesinen Ardagerler kóshesine deıingi ýchaskede jol qozǵalysy shektelgen.
Sondaı-aq Taskesken kóshesiniń Obaǵan kóshesinen S.Nurmaǵambetov kóshesine deıingi ýchaskesinde ortasha jóndeý bastaldy. Munda qozǵalys 22-25 mamyr aralyǵynda jabylady.
Beketaı kóshesinde N.Tilendıev dańǵylynan A. Zataevıch kóshesine deıingi bóliginde ortasha jóndeý júrgiziledi. Kólik qozǵalysy 22-23 mamyr aralyǵynda tolyǵymen shekteledi.
«Elorda turǵyndary men qonaqtary qala joldarynda keptelis týdyrmaý úshin qozǵalys baǵytyn aldyn ala josparlaǵany jón», - delingen ákimdik saıtynda.
