Astanada jóndeý jumystaryna baılanysty birqatar kósheler jabylady
ASTANA. QazAqparat - Astanada jóndeý jumystaryna baılanysty birqatar kósheler jabylady. Bul týraly astana.kz saıtyna Energetıka basqarmasynan habarlady.
Aldaǵy ýaqytta qalalyq jylý jelilerin qalpyna keltirý boıynsha qurylys-montajdaý jumystary qolǵa alynbaq. Vedomstvonyń málimetinshe, bıyl maýsym aıynda jóndeý jumystaryna baılanysty elordanyń keıbir joldarynda kólik qozǵalysy toqtatylady. Atap aıtqanda, 13-15 maýsymda Kenesary kóshesiniń Respýblıka dańǵylynan Ǵabdýllın kóshesine deıingi bóligi, 20-22 maýsymda Seıfýllın kóshesiniń Qoshqarbaev kóshesinen Ǵabdýllın kóshesine deıingi aralyǵy jabyldy. Qazirgi ýaqytta elordada jol jumystary birneshe baǵytta júrgizilip jatyr. Atap aıtqanda, problemalyq ýchaskelerde júktemeni azaıtý, shaǵyn aınalma jol salý, jańa joldar salý jáne eski kóshelerdi qalpyna keltirý, turǵyn alaptarynda jol ınfraqurylymyn damytý, sondaı-aq kóshelerdi ortasha jóndeý jumystary qamtylǵan. Ústimizdegi jyly 76,5 shaqyrym jol jóndelip, qalpyna keltirilmek, sonyń ishinde 19,16 shaqyrymy qosylǵan turǵyn alaptarynda ornalasqan.
