Astanada jóndeý kezinde lıft qulap, bir jumysshy kóz jumdy

ASTANA. KAZINFORM – Elordadaǵy turǵyn úılerdiń birinde lıft qulaý oqıǵasy boıynsha qylmystyq is qozǵaldy. Bul týraly qalalyq Polıtsııa departamenti habarlady.

Vedomstvonyń málimetinshe, oqıǵa kezinde lıft ishinde qyzmet kórsetýshi uıymnyń jóndeý jumystaryn júrgizip jatqan qyzmetkerleri bolǵan.

- Apat saldarynan bir adam qaza taýyp, taǵy eki jumysshy túrli jaraqattarmen aýrýhanaǵa jetkizildi. Qazirgi ýaqytta oqıǵanyń mán-jaıy anyqtalyp jatyr, – delingen habarlamada.

Atalǵan fakti boıynsha eńbekti qorǵaý qaǵıdalaryn buzý, abaısyzda adam ólimine ákep soqtyrý baby boıynsha qylmystyq is qozǵaldy. Tergeý amaldary júrgizilip jatyr.

Eske salsaq, qazirgi kezde eldiń turǵyn úı qorynda 33 858 lıft jabdyǵy bar. Onyń ishinde 4 144 lıft 25 jyldan astam paıdalanylyp keledi, al 3 195 lıft tehnıkalyq qyzmet kórsetý aıasynda kúrdeli jóndeý júrgizýdi talap etetinin jazǵanbyz.