Astanada jolda júrý erejesin buzǵan júrgizýshi 5 táýlikke qamaýǵa alyndy

Bul týraly qalalyq Jol polıtsııasy basqarmasynan habarlady.

JPB-nyń baspasóz qyzmetinen málim etkendeı, búgin Astana qalasynyń mamandandyrylǵan aýdanaralyq ákimshilik sotynda 22 ákimshilik hattama toltyrylyp, jalpy somasy 60 myń teńgege aıyppul salynǵan júrgizýshiniń isi qaraldy. Sottyń sheshimimen ol bes kúnge bas bostandyǵynan aıyryldy. Júrgizýshiniń avtokóligi aıyppul tólengenshe aıyp turaǵyna qoıyldy.

Osy rette, elordalyq Jol polıtsııasy basqarmasy kólik júrgizýshilerin, salynǵan aıyp otyz kúnniń ishinde tólenbegen jaǵdaıda QR Ákimshilik quqyq buzýshylyq týraly kodekstiń 524-shi babyna sáıkes, olarǵa tek aıyppul retindegi jaza ǵana emes, sondaı-aq 10 táýlikke deıin bas bostandyǵynan aıyrý jazasy qoldanylatyndyǵyn eskertti.

Jalpy aǵymdaǵy jyldyń tórt aıy ishinde JPB ınspektorlary jol qozǵalysyn baqylaý barysynda 68 135 ákimshilik quqyqbuzýshylyqty anyqtady. 64 myńǵa jýyq júrgizýshige jalpy somasy 413 mln. teńgege aıyppul salyndy. Sonyń 156 mln. teńgesi ǵana memleket paıdasyna óndirip alyndy.