Astanada jolaı ótip bara jatqan jigitter Sarybulaq ózenine túsip ketken 3 balany qutqardy
NUR-SULTAN. QazAqparat - Elordada jolaı ótip bara jatqan 3 turǵyn Sarybulaq ózenine túsip ketken balalardy qutqaryp qalǵan, dep habarlaıdy QazAqparat qalalyq polıtsııa departamentine silteme jasap.
Keshe tústen keıin kámelet jasyna tolmaǵan úsh bala Sarybulaq kóshesimen úıine qaıtyp kele jatqan. Kóshe janynda osy attas ózen bar edi.
8 jasar ul bala qorshaýdan ótip, órmelep júrgende tepe-teńdikti saqtaı almaı ózenge qulaıdy. Ol belýardan keletin omby qarǵa túsip, odan shyǵa almaı qalady.
Іnisin qutqarmaq bolǵan 10 jáne 12 jasar eki qyz tómenge túsip, ony súırep alyp shyǵýǵa tyrysqan. Biraq ózderi de qalyń qardyń qursaýynda qalyp qoıady.
Balalar jarty saǵattan astam ýaqyt omby qardan shyǵa almaı, sol jerde turady. Denesi tońazyp, qoryqqan úsheýi bar daýsymen aıǵaılap, kómek suraǵan.
Sol jerden ótip bara jatqan úsh jigit sol daýysty estip, kómekke umtyldy. Olar jetkinshekterdi birinen soń birin qardan sýyryp shyǵarady da, kólikke otyrǵyzyp, úıine aparady.
Sodan keıin balalar aýrýhanaǵa jetkizildi. Kóz jasyna ıe bola almaǵan áke úsh jigitke alǵysyn aıtty.
«Ózgeniń ómirine beıjaı qaramaıtyn janashyr jandardyń arqasynda úsh birdeı balaqaı aman qaldy. Sony eskerip, búgin polıtsııa departamenti astanalyq úsh turǵyn - Baýyrjan Muqyshev, Seken Narıman jáne Erjan Shekenovke gramota tapsyryp, rızashylyǵyn bildirdi» delingen habarlamada.
