Astanada jolaýshysy aýyr jaraqat alǵan avtobýs júrgizýshisi jumystan shyǵaryldy
ASTANA. QazAqparat - «Astana LRT» kásiporny avtobýs júrgizýshisiniń saldarynan jaraqat alǵan adamǵa qatysty oqıǵaǵa túsinik berdi, dep habarlaıdy «QazAqparat» HAA tilshisi.
«2018 jyldyń 12 qańtarynda № 47 avtobýsta Gúljan Muhambetqalıevanyń basynan ótken oqıǵa boıynsha atalǵan qoǵamdyq kóliktiń júrgizýshisi jumystan shyǵarylǵanyn habarlaımyz. Qazir qyzmettik tergeý júrip jatyr. Eń birinshi kezekte zardap shegýshiniń saýyǵyp ketýine basa mańyz berilip otyrǵanyn atap ótkimiz keledi», - dep pikir bildirdi mekemeniń baspasóz qyzmetinen.
Aıta ketsek, 15 qańtar kúni Feısbýktegi «Astana hochý pohvalıt/pojalovatsıa» tobynda Ildar Sýmbaı atty qoldanýshy shaǵym qaldyrǵan bolatyn.
«Anamnyń atynan jazyp otyrmyn. Ol kisi 47-avtobýstyń júrgizýshisi men avtoparktiń kesirinen «omyrtqanyń synýy» dıagnozymen jatyr. Ony mindetti túrde ota jasap, ońaltý kerek», - delingen habarlamada.
«Oqıǵa bylaı bolǵan: 2018 jyldyń 12 qańtarda anam balammen birge qydyryp qaıtpaq bolǵan. Balabaqshadan balany alyp shyǵyp, № 47 avtobýsty kútip, qoldaǵy balamen birge avtobýsqa kirgen. Avtobýsta sonymen birge, 5-6 adam bolǵan. Biraq, otyryp úlgermeı jatyp, júrgizýshi birden ornynan jyldam qozǵalǵan. Osynyń saldarynan anam shalqasynan qulaǵan», - delingen áleýmettik jelidegi jazbada.
