Astanada jolaýshylardyń 93 % jolaqyny kólik kartasymen tóleıdi
ASTANA. QazAqparat - Astanada jolaýshylardyń 93 % jolaqyny kólik kartasymen tóleıdi. Qalalyqtardyń tek 6% ǵana jolaqyny qolma qol tóleıdi, dep habarlaıdy Astana ákimdiginiń resmı saıty.
Qoǵamdyq kólikte jolaqyny tóleýdiń elektrondy tólem júıesin engizgeli jolaýshylar aǵyny deńgeıin anyqtaýǵa múmkindik týdy. Bul transport kompanııasynyń taldaý jasaýǵa jáne alynǵan málimetter arqyly qaladaǵy baǵdarlar jelisin sapaly rettep, avtobýstardyń kestesin qurýǵa múmkindik beredi.
«Statıstıkaǵa sáıkes búginge deıin jumys kúnderi jolaýshylar orta eseppen 712 myń sapar shekse, demalys kúnderi bul kórsetkish 470 myńdy quraǵan. Táýliktik eń joǵary jolaýshylar aǵynynyń kórsetkishi - 759 myń sapar. Biregeı kartany 605 myń adam paıdalanady, orta eseppen jeńildikpen júretin jolaýshylar aǵyny - 76,5 myń sapardy qurady. Sonymen qatar, JETJ qoldanýdyń úlesi - 94 % teń», - dedi ákimdikte ótken baspasóz máslıhatynda «Astana LRT» JShS basqarma tóraǵasy Bekmyrza Igenberdınov.
Sonymen birge, onyń aıtýynsha jolaýshylardyń 93% kólik kartasyn paıdalanady, 0,4% QR-kod arqyly tóleıdi, 0,6% SMS arqyly tólese, 6% jolaqyny qolma qol aqshamen tóleıdi. JETJ engizý, onyń baǵalaýynsha, jolaýshylar aǵynyn ashyq etip, onyń saldarynan tasymaldaý tabysynyń 30% ósken.
«Kóliktik kartany toltyrýdyń 10 ádisi bar: RTVM termınaly, kıvı, teńge jáne kassa 24, mamandandyrylǵan kassalar, Transcart.kz, kaspi.kz. saıttary arqyly tóleýge bolady. Jyl sońyna deıin taǵy da 100-den astam bir mezette toltyratyn agenttik oryndar paıda bolady. Bul kóliktik kartany toltyrýda aktıvatsııany qajet epteıtin jańa, jyldam, sol sátte oryndalatyn tásil», - dep habarlady óz kezeginde «Astana LRT» JShS tólem júıesi departamentiniń dırektory - basqarýshy dırektor Dáýren Nuralıev.
