Astanada jolaýshylar jol aqysyn qoldaǵy bilezikpen tóleıtin bolady
ASTANA. QazAqparat - Astana LRT kompanııasy jol aqysyn tóleý úshin kólik kartalaryn bilezik túrinde shyǵarýdy kózdep otyr, dep habarlaıdy QazAqparat tilshisi.
Bul týraly kompanııada ótken dóńgelek ústelde Astana LRT JShS tólem júıesi departamenti dırektory Dáýren Nurálıev aıtyp berdi.
«Qazirgi ýaqytta ózderińiz biletindeı, adamdar qoǵamdyq kólikte tólem júrgizý úshin kóliktik kartany kóptep paıdalanady. Biraq, bizdiń jolaýshylar ártúrli. Ásirese, jastar, balalar men stýdentter qolyna bilezik taqqysy keledi. Qarapaıym úıdiń kiltterine neshe túrli salpynshaqtardy (brelok) ilip qoıýǵa ásirese jastar qumar. Biz aldaǵy ýaqytta kóliktik kartanyń bir túrin - dál osy bilezik sekildi etip shyǵarýdy kózdep otyrmyz. Ol da - karta. Túri bilezikke uqsas demeseńiz, qarapaıym tórt burysh kartadan eshqandaı aıyrmashylyǵy joq. Ol bileziktiń ishinde de chıp bolady», - dedi Dáýren Nurálıev.
Onyń aıtýynsha, bilezikke uqsas kóliktik kartalar osy jyldyń aıaǵyna deıin pılotty joba retinde shyǵarylady. Eger ol halyqqa unap jatsa, kompanııa bilezik kartalardy kóptep shyǵarýdy kózdep otyr.
Eske sala ketsek, buǵan deıin Astana LRT basqarma tóraǵasy Bekmyrza Igenberdınov kólik kartasyn toltyrýdyń jańa ádisin tanystyrǵan bolatyn.
Sonymen qatar, jıyn barysynda kompanııanyń tólem júıesi departamentiniń dırektory Dáýren Nurálıev eki ret tólem alynbaıtynyn óz kartasymen dáleldegedi.
