Astanada jolaýshylar avtobýsy boıjetkendi qaǵyp ketti
ASTANA. QazAqparat - Astanada jaıaý júrginshilerge arnalǵan jolda avtobýs boıjetkendi qaǵyp ketti, dep habarlaıdy QazAqparat tilshisi.
«20 jeltoqsan kúni №54 avtobýs Túrkistan kóshesimen Almaty kóshesi baǵytyna qaraı kele jatyp, jaıaý júrginshiler jolyna kenet shyǵa kelgen boıjetkendi qaǵyp ketti. Oqıǵa kezinde avtobýstyń jyldamdyǵy 29 shaqyrym/saǵat bolǵan», - dep habarlaıdy «Astana LRT» baspasóz qyzmetinen.
Kompanııa taratqan habarlamaǵa sáıkes, zardap shekken adam qalalyq №2 aýrýhanaǵa jetkizilgen. Oqıǵa ornyna jetken jergilikti polıtsııa qyzmetkerleri avtobýs júrgizýshisine qatysty hattama toltyrdy.
«Basshylyqtyń sheshimi boıynsha atalǵan avtobýstyń júrgizýshisi laýazymynan bosatylyp, «qara tizimge» kirgizilgen. Demek, bul degenimiz onyń budan bylaı qoǵamdyq kólikti júrgize almaıtynyn bildiredi», - delingen habarlamada.
