Astanada jolaýshylardyń 30-40 paıyzy aqy tólemeıdi — park basshysy
ASTANA. KAZINFORM — Qoǵamdyq kólik aqysyn tóleýden jaltaratyn astanalyq jolaýshylar máselesi qalaı sheshilmek? Bul saýalǵa № 1 avtobýs parkiniń basqarma tóraǵasy Madııar Tuqpatov jaýap berdi.
«Jolaqy tólemeıtinderdiń sany kóp, qazir jolaýshylardyń 30-40% aqy tólemeı júre beredi. Saldarynan biz shyǵynǵa batyp jatyrmyz. Bizdiń parkte 150 kólik baqylaý departamenti qyzmetkeri (kontroler) bar, qyzmetkerlerdiń sanyn 200-ge deıin arttyramyz dep otyrmyz. Biz baqylaýshylardyń arqasynda kún kórip otyrmyz, olardyń mindeti — jolaqynyń tólengenin qadaǵalaý», — dedi Madııar Tuqpatov № 1 avtobýs parkinde uıymdastyrylǵan baspasóz týry barysynda.
Onyń aıtýynsha, jolaýshylar aqy tóleýge asyqpaıdy, baqylaýshylardy kórgen kezde ǵana janyǵyp tóleı bastaıdy.
«Demek baqylaýshy bolmasa múldem tólemeı júredi degen sóz. Sondyqtan olardyń sanyn kóbeıtip, baqylaýdy kúsheıtemiz», — deıdi ol.
Sondaı-aq, avtobýs parkiniń basshysy aqy tólemegen jolaýshylarǵa aıyppul salýmen máseleniń sheshilmeıtindigin aıtyp otyr.
