Astanada jolaqy tóleýden jaltarǵandarǵa 25 mln teńge aıyppul salyndy
ASTANA. QazAqparat - Astanadaǵy qoǵamdyq kólikterde jol aqysyn tóleýden jaltaratyndar sany azaımaı tur, dep habarlaıdy QazAqparat Habar-24 agenttigine silteme jasap.
Kartany «avtomatty qondyrǵyǵa bastym» dep, artynsha ótirigi ashylatyndar kóp. Osylaısha aqy berýden jaltarmaq bolǵan 5200-den asa adamǵa jalpy quny 25 mıllıon teńge aıyppul salynǵan. Jolaýshy tasymalymen aınalysatyn mamandar «avtobýstaǵy mádenıet áli de tómen» dep qynjylady. Elordadaǵy qoǵamdyq kólikterge ótken jyly saralanǵan tarıf engizildi. Sodan beri avtobýs parkteri birshama paıdaǵa kenelip jatyr. Bıýdjet túsimi de artty. Aıtalyq, elektrondy tólem júıesi arqyly tabys kólemi 300 mıllıon teńgege deıin ulǵaıǵan. «Sondyqtan kartanyń sharapaty mol» deıdi mamandar.
Alaıda, «avtomatty tólem» júıesi engizilgeli júrgizýshilerdiń de, nusqaýshylardyń da jumysy aýyrlady. Durysy, júıkeleri juqaratyn boldy. Sebebi ár jolaýshydan «kartańyzdy bastyńyz ba?» dep suraı bergendi kim jaqtyrsyn. Eger aqy tólemegeni áshkerelense, sońy janjalmen tynady. Bir sózben aıtqanda, avtobýstaǵy mádenıet áli de tómen.
«Tekseristen soń jol aqysyn tólemegender anyqtalsa, sógis estıtin - avtobýstaǵy nusqaýshylar. Sondyqtan avtomatty tólem júıesi áli rettele qoımady. Kartaǵa qapalylar kóp. «Salǵan aqshamyz tez taýsylady ıakı ýaqytynda túspeıdi» dep narazy», - deıdi qoǵamdyq kólik nusqaýshysy Nurjamal Dúısenbaeva.
«Qashyqtyqtan nemese ınternetten salǵanda, aqsha birden túspeıdi. Biz ony ózimizdiń saıttaǵy shartta aıtyp ketkenbiz. Ár adam qashyqtyqtan toltyrǵan kezde onymen kelisedi. ıAǵnı birden emes, 24 saǵat ishinde túsedi degen talapqa boıusynady. Kóp adamdar túsinispeýshilik saldarynan ony avtobýsqa otyrǵan kezde baıqap jatady», - dep túsindirdi «Astana LRT» JShS tólem júıeleri departamentiniń dırektory Dáýren Nuralıev.
Aqsha ýaqytynda túspese, termınaldar bar. Biraq bul jerde de jaǵdaı máz emes. Yǵy-jyǵy adam. Uzyn-sonar kezek. Jalpy qala boıynsha kartany toltyrýǵa arnalǵan 30 termınal, 6 mamandandyrylǵan kassa jumys isteıdi. Sonda da kezek qysqarar emes. Kezek kútý máselesi jyl sońyna deıin sheshiledi.
«Astana LRT» ókilderi málimdegendeı, jeltoqsan aıynda elordada kartaǵa aqsha salatyn qosymsha 100 bólimshe ashylady. Qazir shahardaǵy qoǵamdyq kólikterde kartamen qatynaıtyndardyń qatary 93 protsentke jetken. Sondyqtan «kondýktor» ataýly atymen joq. Nusqaýshylar ǵana bar. Endi avtomatty tólem kórsetkishi 97-99 protsentke jetkende, avtobýstarda tek júrgizýshiler ǵana qalady.
