Astanada jolaqy tólemegen 5 myńdaı jolaýshyǵa aıyppul salyndy
ASTANA. QazAqparat - Astana LRT JShS Basqarma tóraǵasynyń orynbasary Beıbit Esjanov kompanııanyń kóliktik baqylaý qyzmeti qaýyrt jumys júrgizip jatqanyn aıtyp berdi, dep habarlaıdy QazAqparat tilshisi.
«Qazirgi tańda júıeli jáne jeke sıpatta da sheshilmegen máseleler barshylyq. Kóliktik baqylaý qyzmeti týraly aıtar bolsaq, buryn bizdiń ol departamentimizde bar-joǵy 16 qyzmetker ǵana eńbek etetin. Búgingi tańda ol departamenttegi qyzmetkerdiń sany 70-ke jetti. Olardyń sanyn áli de 100-ge deıin jetkizýdi kózdep otyrmyz. Biz turaqty túrde monıtorıng júrgizip, júrgizýshiler quramy tarapynan quqyqbuzýshylyqtardy anyqtaýdamyz», - deıdi Beıbit Esjanov kompanııada ótken dóńgelek ústel barysynda.
Onyń aıtýynsha, 1 qazannan bastap kompanııa aıyppul júıesine kóshken.
«Qazirdiń ózinde júrgizýshiler men tasymaldaýshylarǵa qatysty 651 hattama toltyrylyp, olarǵa 11 mln teńgeniń aıyppuly salyndy. 615 júrgizýshi ákimshilik jaýapkershilikke tartyldy. Kóliktik baqylaý qyzmeti 24/7 tártibi boıynsha jumys júrgizedi. Kezek boıynsha jumysqa shyǵady. Túnde biz kameralarda tirkelgen buzýshylyqtardy anyqtaımyz. Joldyń qarama-qarsy baǵytymen júrip ketkeni úshin ákimshilik sotta 6 avtobýs júrgizýshisi kýáliginen aıyryldy», - deıdi ol.
Astana LRT JShS Basqarma tóraǵasynyń orynbasarynyń sózine sensek, jol aqysyn tólegisi kelmeıtin jolaýshylarǵa da qatysty sharalar qabyldanyp jatyr.
«Qoǵamdyq kólikte dál osylaı tólem júrgizgisi kelmegen 4 878 jolaýshy anyqtaldy. Olarǵa jalpy somasy 23,5 mln teńgeniń aıyppuly salyndy. Jolaýshylar qazir tártipke baǵynyp keledi. Dese de, mundaı faktilerdáń kezdesip jatatyny ras. Kún saıyn biz 100-ge jýyq hattama toltyramyz. Saralanǵan tarıf engizilgeli beri jumys kúsheıtildi», - deıdi Beıbit Esjanov.
Eske sala ketsek, Astana LRT kompanııasynda ótken búgingi dóńgelek ústelde Basqarma tóraǵasy Bekmyrza Igenberdınov kólik kartasyn toltyrýdyń jańa ádisin tanystyrǵan bolatyn.
Sonymen qatar, jıyn barysynda Tólem júıesi departamentiniń dırektory Dáýren Nurálıev eki ret tólem alynbaıtynyn óz kartasymen dáleldedi.
