Astanada jolaqy 100 teńgege qymbattaýy múmkin
ASTANA. QazAqparat - Astana qalasyndaǵy avtopark basshylary qala ákimdigine jolaqyny kóterý kerek dep shaǵymdanýda. Olardyń aıtýynsha, bas qalada tarıf 2008 jyldan beri ózgermegen. Jolaqy eresekter úshin - 100 teńgege, al, balalar úshin 40 teńgege qymbattaýy múmkin, dep habarlaıdy «Qazaqstan» ulttyq arnasy.
Avtopark basshylarynyń aıtýynsha, Astanada qoǵamdyq kólikpen júrý 60-65 teńge bolyp bekitilgenine 6 jyl boldy. Endi bul tarıfty birden 66 paıyzǵa kóterý josparlanyp otyr. Onyń sebepteri de joq emes. Astana qalasy №4 avtobýs parki dırektorynyń orynbasary Esenǵazy Álmaǵanbetovtiń aıtýynsha, q osalqy bólshekterdiń baǵasy jyldan-jylǵa ósip barady. 2010 jylmen salystyrǵanda eki esege ósken. Janar-jaǵarmaıdyń buryn 76 teńge bolsa, qazir 115 teńge. Avtopark basshylary jolaqy qymbattatýdyń basqa da sebepterin aıtyp dabyl qaǵýda. Búginde qoǵamdyq kólik júrgizýshisiniń ortasha aılyǵy - 100 myń teńge. Al, bul qyzmetkerlerdi qynjyltady. Osy sebepti bas qalada 250-ge jýyq júrgizýshi jetispeıdi eken.
Ábdihamıt Tamabaev, Astana qalasy Jolaýshylar tasymaly jáne avtomobıl joldary basqarmasy basshysynyń orynbasary: «Osyǵan baılanysty tarıfterdi qaıta qarastyrý týraly bizge usynys jasady. Biz osyny qarastyrý úshin Astana qalasy Jolaýshylar kóligi jáne avtomobıl joldary basqarmasy basshysynyń buıryǵymen jumys tobyn qurdyq. Jumys tobyna aldymen ekonomıst-fınansıst mamandar tartyldy. Komıssııanyń alǵashqy shyǵarǵan eseptemesi boıynsha bir kisini tasymaldaý quny - 113 teńge. Áıtkenmen, bul másele qaıta qaralyp, bılet quny 100 teńgege tómendegen. Alaıda, qoǵamdyq kólikpen kún saıyn qatynaıtyn qala turǵyndary bul baǵany qymbatsynady». Halyq pikiri: «Jalaqymyz 40-60 myń teńge. Jumysqa baryp-kelýimizdi esepteı berińiz. - Jolaqy bıleti qazir 5700 teńge, baǵa ózgerse, qansha bolady sonda? - 60 teńge de, 100 teńge de qymbat». Baǵa máselesi jýyrda sheshimin tappaq. Jaýapty organdardyń aıtýynsha, arnaıy toptyń suryptaýynan ótken usynys, aldaǵy kúnderi máslıhatqa joldanady.
