Astanada jol jumysshylaryna arnalǵan jańa demalys bólmeleri ashyldy
ASTANA. KAZINFORM — Astana qalasynda kommýnaldyq sala qyzmetkerleriniń eńbek jaǵdaıyn jaqsartýǵa baǵyttalǵan jańa áleýmettik joba júzege asty.
«Astana Tazalyq» JShS bir jyl ishinde jol jumysshylary úshin arnaıy turmystyq jáne demalys bólmelerin kúrdeli jóndeýden ótkizip, paıdalanýǵa berdi. Joba ákimdiktiń qoldaýymen iske asyryldy.
Jańartylǵan on bólme «Esil» jáne «Nura» aýdandarynda ornalasqan jáne 200-den astam jol jumysshysynyń kúndelikti turmystyq qajettilikterin óteýge arnalǵan. Sonymen qatar, «Shyǵys» jáne «Batys» turǵyn úı keshenderiniń tómengi qabattarynan qosymsha oryndar alynyp, tolyq qaıta jabdyqtalǵan.
Búgin osy jańa demalys bólmeleriniń tusaýkeseri ótip, jol jumysshylary kúndelikti qajyrly eńbektiń arasynda dem alyp, tynyǵatyn óz keńistigine ıe boldy. Qyzmetkerlerge arnalǵan bul oryndar janǵa jaıly ıntererimen, zamanaýı tehnıkasymen jáne sanıtarlyq talaptarǵa saı jabdyqtarymen kóz tartady. Munda shaı qaınatyp, tamaqtanyp, kıimin túzep, kelesi aýysymǵa tyń kúıde shyǵýǵa múmkindik qarastyrylǵan.
Jóndeý jumystarynyń aýqymy keń boldy: sanıtarlyq-gıgıenalyq toraptar qaıta jasaqtaldy, demalys pen tamaqtanýǵa arnalǵan oryndar jańartyldy, jumysshylardyń qysqa úziliste qalpyna kelýine qolaıly shaǵyn tynyǵý buryshtary uıymdastyryldy.
Alǵashqylardyń biri bolyp bólmeni aralap shyqqan jol jumysshysy Madat Tuıaqbaev jańa keńistiktiń mańyzyna toqtaldy.
— Bul bólmelerdiń jasalǵany biz úshin jaqsy boldy. Buryn mundaı múmkindik bolmady. Qazir jyly jerde otyryp tynyǵyp, shaı iship alýǵa jaǵdaı bar. Qarapaıym nárse bolsa da, jumysqa úlken kómek beredi, — dedi ol.
Joba qala tazalyǵyn qamtamasyz etetin qyzmetkerlerge degen qurmetti kúsheıtip qana qoımaı, kommýnaldyq salanyń jalpy eńbek mádenıetin jańǵyrtýdy kózdeıdi.
— Bizdiń maqsatymyz — tek qalanyń tazalyǵyn qamtamasyz etý emes, sonymen birge sol jumysty atqaryp júrgen ár qyzmetkerdiń jaǵdaıyn jaqsartý. Bul demalys bólmeleri — jumysshylardyń densaýlyǵyna, eńbek ónimdiligine jáne jalpy áleýmettik qoldaýyna baǵyttalǵan mańyzdy qadam. Qyzmetkerlerimizdiń eńbegin baǵalap, laıyqty jaǵdaı jasaý — bizdiń azamattyq ári kásibı mindetimiz, — dedi «Astana Tazalyq» JShS bas dırektory Zamır Sagınov.
Budan buryn elordanyń jasyl aımaǵyna qoıylatyn sanıtarlyq talaptar kúsheıtiletini belgili boldy.