Astanada jol jóndeý jumystaryna 5,5 mıllıard teńge bólindi
ASTANA. QazAqparat - EXPO-2017 halyqaralyq kórmesine daıyndyq barysynda Astana qalasyndaǵy jol jóndeý jumystaryna 5,5 mıllıard teńge bólindi. Bul týraly búgin Astana ákimdiginde ótken baspasóz máslıxatynda «Astana qalasynyń avtomobıl joldary basqarmasy» MM basshysy Ashat Qaraǵoıshın málim etti.
«Astana qalasyndaǵy jol jóndeý jumystaryna alǵashqy jartyjyldyqqa 5 mıllıard teńge bólindi. Bul qarajat zaqym kelgen asfalttyń ústińgi jabynyn aýystyrýǵa, shuńqyrlardy jóndeý sekildi aǵymdaǵy jumystardy júrgizýge jumsalady. Bul alǵashqy jartyjyldyqta jasalatyn jumystar. Ekinshi jartyjyldyqtan bastap jyl sońyna deıin taǵy 50 kóshege jóndeý jumystaryn júrgizý josparlanǵan», - dep málimdedi basqarma basshysy.
Buǵan deıin habarlanǵandaı, sáýir-mamyr aılarynda Astanada jóndeý jumystaryn júrgizýge baılanysty keıbir kósheler jabylady. Atap aıtqanda, 15 - 25 sáýirde Almaty kóshesiniń Qabanbaı batyr dańǵylymen qıylysy, 26 sáýirden bastap 10 mamyrǵa deıin Kereı-Jánibek handar kóshesiniń Qabanbaı batyr dańǵylymen qıylysynda qozǵalys ýaqytsha shekteledi. Sonymen qatar, mamyrdyń 10-y men 15-i aralyǵynda Qabanbaı batyr dańǵylynyń Orynbor kóshesimen (Syǵanaq k-si) qıylysy ýaqytsha jabylady. 15 sáýirden 15 mamyr aralyǵynda N.Tilendıev dańǵylynda Sh. Beısekova kóshesimen qıylysta, 16-26 mamyrda Sh. Beısekova kóshesinde N. Tilendıev dańǵyly men S. Seıfýllın kóshesiniń arasynda qozǵalys shekteledi.
15 sáýir - 30 mamyr aralyǵynda sol jaǵalaýdaǵy 11 kóshede, oń jaǵalaýdaǵy 3 kóshede jol jabynyn jóndeý jumystary júrgiziledi.
