Astanada jol ústinde jeńil kólik órtenip, zardap shekkender boldy
ASTANA. KAZINFORM — Astananyń Saraıshyq aýdanyndaǵy Amanjolov kóshesinde jeńil avtokólik órtendi, dep habarlaıdy Kazinform agenttiginiń tilshisi.
Qalalyq Tótenshe jaǵdaılar departamentiniń málimetinshe, oqıǵa ornyna órt sóndirý bólimsheleri men Apattar medıtsınasy ortalyǵynyń qyzmetkerleri jedel jetken. Órt arnaıy qyzmetterdiń kúshimen sóndirildi.
Kýágerlerdiń aldyn ala aqparaty boıynsha, órt sóndirýshiler kelgenge deıin kólikte gaz-aýa qospasynyń jarqyly bolyp, artynsha órt shyqqan. Saldarynan jaqyn mańda turǵan birneshe kólikke zaqym kelgen.
Oqıǵa saldarynan zardap shekkender bar. Olarǵa qajetti medıtsınalyq kómek kórsetilip, keıin qalanyń medıtsınalyq mekemelerine jetkizildi.
Qazir mamandar órttiń shyǵý sebepterin anyqtap jatyr.
TJD mamandary kólik ıelerine tehnıkalyq qyzmet kórsetýdi ýaqtyly júrgizip, órt qaýipsizdigi talaptaryn saqtaýdyń mańyzyn eske saldy.
Aıta keteıik, buǵan deıin Astananyń Baıqońyr aýdanyndaǵy jeke turǵyn úı sektorynda órt shyǵyp, úsh nysannyń shatyry janǵan bolatyn.
