Astanada jol talǵamaıtyn kólik qaǵyp ketken jasóspirim áli esin jımady
ASTANA. QazAqparat - Astanada jol apatynan zardap shekken, búıregi men kók baýyryn alyp tastaǵan 14 jastaǵy jasóspirim áli jansaqtaý bóliminde jatyr. Bul týraly elordanyń densaýlyq saqtaý basqarmasynyń baspasóz qyzmeti habarlady.
«Jasóspirim burynǵysha aýyr jaǵdaıda jansaqtaý bóliminde jatyr», - dep habarlady telefon boıynsha «QazAqparat» tilshisine baspasóz qyzmetiniń qyzmetkeri.
Eske salsaq, «Lexus» kóliginiń 36 jastaǵy júrgizýshisi Asan Qaıǵy kóshesiniń boıymen Imanov kóshesine qaraı bara jatyp, qıylysta basqa kólikke jol bermeı, nátıjesinde Mercedes-Benz kóligimen soǵysqan. Alǵan soqqydan Lexus júrgizýshisi kámeletke tolmaǵan balalar men turaqta turǵan "Lada"kóligin soqqan. Keıinnen Lexus taǵy da turaqta turǵan ZAZ markaly kólikke soǵysyp, odan sol jerde turǵan Mitsubishi kóligimen taǵy soǵysqan", - dep habarlady Astana qalalyq ІІD ókilderi.
Apat saldarynan 2002, 2005, 2007 jyldary týylǵan jasóspirim balalar zardap shekti.
Densaýlyq saqtaý basqarmasynyń baspasóz qyzmetinde habarlaǵandaı, zardap shekken balalar №2 balalar aýrýhanasyna jetkizildi.
Budan buryn Astanada balalardy soqqan Lexus-570 kóliginiń júrgizýshisi ishimdik ishpegeni habarlanǵan. Apat faktisi boıynsha sot aldy tergeý júrgizilýde.
