Astanada jol salýǵa arnalǵan zamanaýı materıaldar men jabdyqtar tanystyryldy

ASTANA. KAZINFORM – Avtomobıl joldarynyń sapasy, qozǵalys qaýipsizdigi, jańa qurylys materıaldary men salany tsıfrlandyrý. Astanada ashylǵan XXII halyqaralyq «Kaztraffic 2026» kórmesinde osy máselelerge erekshe mán berildi.

o
Foto: Soltan Jeksenbekov / Kazinform

Kórmege memlekettik organdardyń, ǵylym men bıznes ókilderi, qazaqstandyq jáne sheteldik mamandar jınaldy. Kazinform tilshisi jol salasyndaǵy jańa tehnologııalarmen tanysyp, kásiporyndardyń qandaı ónim usynyp jatqanyn bildi.

Bıyl kórmege 150-ge jýyq otandyq jáne sheteldik kompanııa qatysyp jatyr. Olar avtomobıl joldaryn salýǵa, jóndeýge arnalǵan tehnıka men jabdyqtardy, qurylys materıaldaryn, joldyń jaı-kúıin anyqtaý jáne baqylaý júıelerin, qozǵalys qaýipsizdigin arttyratyn tehnologııalardy kópshilik nazaryna usyndy.

o
Foto: Soltan Jeksenbekov / Kazinform

Jol sapasyn arttyrý – basty mindet

Kórmeniń ashylýynda QR Kólik vıtse-mınıstri Maqsat Qalıaqparov avtomobıl joldarynyń óńirlerdi damytý men elimizdiń tranzıttik áleýetin arttyrýda strategııalyq mańyzy bar ekenin atap ótti.

Onyń sózinshe, jol jelisin keńeıtýmen shektelmeı, qurylys sapasyna, materıaldardy durys tańdaýǵa jáne tehnologııa talaptarynyń saqtalýyna basa mán berý qajet. Vıtse-mınıstr Memleket basshysy Qasym-Jomart Toqaevtyń Qazaqstan halqyna Joldaýynda osy baǵytta bergen tapsyrmalaryn eske saldy.

o
Foto: Soltan Jeksenbekov / Kazinform

– Avtomobıl joldarynyń sapasy halyqtyń kúndelikti turmysyna, óńirlerdiń damýyna jáne elimizdiń tranzıttik áleýetine tikeleı áser etedi. Sondyqtan negizgi mindetimiz – joldardyń sapasy men qaýipsizdigin arttyrý, qyzmet etý merzimin uzartý, – dedi Maqsat Qalıaqparov.

Sońǵy jyldardaǵy kórsetkishter atqarylǵan jumystyń aýqymyn ańǵartady. Kólik mınıstrliginiń málimetinshe, 2020–2026 jyldary Qazaqstanda 31 myń shaqyrym avtomobıl joly qaıta jańǵyrtylyp, jóndelgen. Onyń 12,5 myń shaqyrymy – respýblıkalyq, 18,5 myń shaqyrymy – jergilikti mańyzy bar joldar.

Osy kezeńde normatıvtik jaǵdaıdaǵy respýblıkalyq joldardyń úlesi 89 paıyzdan 93 paıyzǵa, jergilikti joldardyń úlesi 71 paıyzdan 91 paıyzǵa deıin ósken. Tórt jolaqty avtomobıl joldarynyń uzyndyǵy 2,3 myń shaqyrymnan 4,4 myń shaqyrymǵa jetken.

Alaıda jol salasynyń damýy jóndelgen joldardyń uzyndyǵymen ǵana ólshenbeıdi. Jol jabynynyń kólik júktemesi men aýa temperatýrasynyń aýytqýyna qanshalyqty tótep bere alatyny da mańyzdy.

o
Foto: Soltan Jeksenbekov / Kazinform

Sondyqtan Maqsat Qalıaqparov joldy jobalaý, salý jáne kútip ustaý kezeńderiniń bárinde sapa talaptaryn saqtaý qajet ekenin aıtty.

Jol sapasyn baqylaýda jańa tehnologııalar qoldanylady

Vıtse-mınıstr jol salasyn tsıfrlandyrý máselesine de toqtaldy. Aldaǵy ýaqytta jol sapasyn baqylaý júıesi jetildirilmek. Atap aıtqanda, 2026–2029 jyldary KazRoadLab jáne E-Joldar júıelerin biriktirý, tehnıkalyq qadaǵalaý men asfaltbeton óndirisin baqylaýdy tsıfrlandyrý josparlanyp otyr.

Mundaǵy maqsat – joldyń jaı-kúıin baǵalaý, jóndeý jumystaryn josparlaý jáne olardyń oryndalýyn baqylaý kezinde naqty derekterge súıený. Vıtse-mınıstrdiń aıtýynsha, jasandy ıntellekt pen zııatkerlik kólik júıeleri bul jumystardyń tıimdiligin arttyrýǵa múmkindik beredi.

o
Foto: Soltan Jeksenbekov / Kazinform

Joldyń uzaqqa shydaýy qurylys materıaldarynyń sapasyna da baılanysty. Búginde elimizde jol qurylysyna arnalǵan materıaldar men jańa tehnologııalardyń biryńǵaı derekqory jumys isteıdi. Onda ónimderdiń sıpattamasy, synaq nátıjeleri jáne qoldanylý aıasy týraly málimetter jınaqtalǵan. Bul mamandarǵa ár jol jobasyna laıyq materıal men tehnologııa tańdaýǵa kómektesedi.

Maqsat Qalıaqparov elimizde óndiriletin polımermen túrlendirilgen bıtýmdy qoldanýǵa basymdyq berilip otyrǵanyn atap ótti. Mundaı bıtým asfaltbeton jabynynyń oıylýǵa jáne jaryqshaqtanýǵa tózimdiligin arttyrady.

o
Foto: Soltan Jeksenbekov / Kazinform

Atalǵan máseleler kórmeniń ǵylymı baǵdarlamasynda da qamtylǵan. «Kaztraffic 2026» aıasynda «Joldar jáne ınnovatsııalar» atty II halyqaralyq ǵylymı-praktıkalyq konferentsııa ótip jatyr. Mamandar tsementbeton jáne asfaltbeton jabyndaryn tóseý tehnologııalaryn, jańa qurylys materıaldaryn, tsıfrlyq sheshimder men jol jobalaryn qarjylandyrý tetikterin talqylap jatyr.

Jol salasynyń damýyna memlekettik baǵdarlamalar men ǵylymı ázirlemelerden bólek, qurylys materıaldary men jabdyqtar shyǵaratyn kásiporyndar da úles qosyp keledi. Kazinform tilshisi kórmede olardyń birqatar ónimimen tanysty.

o
Foto: Soltan Jeksenbekov / Kazinform

Qazaqstandyq kásiporyndar qandaı ónim usynady?

Kórmede tanystyrylǵan otandyq ónimderdiń biri – jol boıyna ornatylatyn metall qorshaýlar. Olar jol-kólik oqıǵalarynyń zardabyn azaıtyp, qozǵalys qaýipsizdigin arttyrýǵa arnalǵan.

Mundaı qorshaýlardyń qalaı jasalatyny jáne qaıda qoldanylatyny týraly «Staltsınk» JShS kommertsııalyq qyzmet basqarmasynyń basshysy Ásem Áýezova aıtyp berdi.

Kásiporyn 2007 jyldan beri jumys isteıdi. Kompanııa ókiliniń sózinshe, zaýyttyń alǵashqy iri jobalarynyń biri Astana – Şýchınsk tasjoly bolǵan. Keıin kásiporyn «Batys Eýropa – Batys Qytaı» dáliziniń ýchaskelerine, Qaraǵandy – Balqash, Kúrti – Qonaev tasjoldaryna jáne Aqtóbe oblysyndaǵy jol nysandaryna ónim jetkizgen.

o
Foto: Soltan Jeksenbekov / Kazinform

Ásem Áýezova óndiristiń ereksheligine de toqtaldy. Kásiporynda metall qorshaý jasaýdyń barlyq kezeńi qamtylǵan. Shıkizat avtomattandyrylǵan jelilerde óńdelip, daıyn buıymdar myryshtaý tsehyna jiberiledi.

– Bizdiń artyqshylyǵymyz – ónimdi basynan aıaǵyna deıin ózimiz daıyndaımyz. Kásiporynǵa jetkizilgen shıkizatty avtomattandyrylǵan jelilerde óńdeımiz. Sodan keıin daıyn buıymdardy myryshtaý tsehyna jiberemiz. Bizde uzyndyǵy 12 metrlik myryshtaý vannasy bar. Sondyqtan ónimdi qosymsha óńdeý úshin basqa kásiporynǵa jiberýdiń qajeti joq, – dedi Ásem Áýezova.

Onyń aıtýynsha, kásiporyndaǵy otandyq óndiristiń úlesi shamamen 98 paıyzdy quraıdy. Kompanııa qazaqstandyq taýar óndirýshiler tizilimine engen. Sáıkestik sertıfıkattary men qajetti normatıvtik qujattary bar.

o
Foto: Soltan Jeksenbekov / Kazinform

Kásiporyn ónimderin jol jóndelip, qaıta jańǵyrtylyp jatqan óńirlerge jetkizedi. Byltyr Ózbekstanǵa da ónim jóneltken. Aldaǵy ýaqytta TMD-nyń ózge elderiniń naryǵyna shyǵý múmkindigin qarastyryp otyr.

Zaýyt metall qorshaý shyǵarýmen ǵana shektelmeıdi. Munda elektr jetkizý jelilerine arnalǵan bıiktigi ártúrli ankerlik-buryshtyq tirekter men aýyl sharýashylyǵyna qajetti jańbyrlatyp sýarý qondyrǵylary óndiriledi. Kásiporyn konstrýktorlyq qujattar boıynsha metall konstrýktsııalar jasaýǵa da tapsyrys qabyldaıdy.

«Kaztraffic 2026» halyqaralyq kórmesi 20 qarashaǵa deıin jalǵasady. Úsh kún boıy qatysýshylar jańa tehnologııalarmen tanysyp, tájirıbe almasady. Jol qurylysynyń sapasyn arttyrý, zamanaýı materıaldardy qoldaný, salany tsıfrlandyrý jáne qozǵalys qaýipsizdigin qamtamasyz etý máselelerin talqylaıdy.

o
Foto: Soltan Jeksenbekov / Kazinform

Kórmeniń iskerlik baǵdarlamasy men mamandardyń kezdesýleri jańa baılanys ornatýǵa, usynylǵan tehnologııalardy elimizdiń jol qurylysynda qoldaný múmkindikterin talqylaýǵa jol ashady dep kútilip otyr.

Aıta keteıik, buǵan deıin Qazaqstanda avtomobıl joldarynyń jaı-kúıin baǵalaý úshin Japonııanyń mobıldi kartografııalaý júıesin qoldaný múmkindigi qarastyrylyp jatqanyn jazǵan edik.