Astanada jol polıtseıleri taksı júrgizýshisine shabýyl jasaǵan buzaqyny ustady
ASTANA. 8 qarasha. QazAqparat /Gúlmıra Álıakparova/ - EQYU Sammıti qarsańynda Astana kóshelerindegi tártipti qadaǵalaý úshin óńirlerden quqyq qorǵaý organdary qyzmetkerlerin qosymsha jumyldyrý alǵashqy nátıjelerin bere bastady.
Jeksenbi kúni jol polıtseıleri taksı júrgizýshisine shabýyl jasaǵan buzaqyny sanaýly mınýttarda quryqtady.
Astana qalasy Іshki ister departamenti Jol polıtsııasy basqarmasynan málim etkendeı, 7 qarashadan 8-ine qaraǵan túni kezekshilikterin atqarý barysynda eki jol polıtseıi Dúkenuly kóshesiniń jıeginde «VAZ-2109» avtokóligin jáne onyń janynda jatqan kóliktiń ıesin baıqaǵan. Suraý barysynda anyqtalǵandaı, qara tústi kıimder kıgen eki adam 59 jastaǵy kólik ıesin soqqyǵa jyǵyp, belgisiz baǵytta izderin jasyrǵan.
Jaqyn mańdaǵy aýdandardy tekserý barysynda 10 mınýttan keıin, ózin Nurlan Dosjanuly Tasmaǵambetov dep tanystyrǵan 1990 jyly týǵan azamat ustaldy. Jábirlenýshi buzaqyny tanyǵannan keıin, ol «Saryarqa» aýdandyq ishki ister basqarmasyna jetkizildi.
Oń aıaǵy synǵan taksıst aýrýhanaǵa jetkizildi.
