Astanada jol qurylysyna arnalǵan halyqaralyq kórme ótýde
ASTANA. QazAqparat - Elordada «Qazavtojol- Kaztraffic-2018» XV halyqaralyq kórmesi ótip jatyr, dep habarlaıdy QazAqparat tilshisi.
Kórmede avtomobıl joldarynyń qurylysy men olardy jóndeý, kútip ustaý baǵytyndaǵy sońǵy ǵylymı jáne tehnologııalyq jetistikter usynylǵan.
Halyqaralyq sharaǵa 100-ge tarta kompanııa óz ónimderin ákelgen. Onyń ishinde elimizden bólek, Reseı, Belarýs, Germanııa, Frantsııa, Italııa, Shvetsııa, Túrkııa, Koreıa Respýblıkalarynyń ókilderi qatysýda.
«Jol qurylysy jelilerin salý men damytý bizdiń mınıstrlik atqaratyn memlekettik mańyzy bar isterdiń biri. Óıtkeni, jol qozǵalysy, onyń ishinde avtombıl joldary halyq qarym-qatynasy men el ekonomıkasy damýynyń negizgi tiregi. Ústimizdegi jyly elimiz boıynsha 4,5 myń shaqyrymnan astam respýblıkalyq mańyzy bar kólik joldary jóndeldi. Al búgingi kórmege elimiz ben sheteldiń 100-ge jýyq kompanııasynyń avtojoldar men jol qurylystary salasyndaǵy sońǵy ári jańa tehnologııalary qoıyldy», - dedi QR Investıtsııalar jáne damý vıtse-mınıstri Roman Sklıar kórmeniń ashylýynda. 
Búgin tústen keıin kórme aıasynda «Óńirlik jol qurylymdaryn damytýdyń sheshý joldary» atty ǵylymı-praktıkalyq konferentsııa ótedi.
Ekikúndik shara barysynda jol qurylysy salasyndaǵy kompanııa ókilderi ózara tájirıbe almasyp, birqatar kelisimder jasaıtyny kútilýde.
Kórme QR Investıtsııalar jáne damý mınıstrliginiń qoldaýymen, VS Expo Com kompanııasynyń uıymdastyrýymen Astanadaǵy «Kórme» ortalyǵynda ótýde.
