Astanada jol-kólik apatynan zardap shekken oqýshynyń jaǵdaı aýyr
ASTANA. QazAqparat - Astanada jol-kólik apatynan zardap shekken 14 jastaǵy jasóspirimniń densaýlyǵy aýyr kúıde qalyp otyr. Ota kezinde onyń búıregi men kókbaýyry alynyp tastaldy. Bul týraly Astana qalalyq densaýlyq saqtaý basqarmasynyń baspasóz qyzmeti habarlady.
«Búırek pen kókbaýyrdy saqtap qalý múmkin bolmady. Sebebi sol jaq búıregi men kókbaýyry ezilip ketken. Qazirgi ýaqytta balanyń jaǵdaı óte aýyr. Ol qazir jansaqtaý bóliminde», - dedi basqarmanyń baspasóz qyzmetshisi «QazAqparat» tilshisine bergen jaýabynda.
Basqarmanyń habarlaýynsha, sonymen qatar onda qatty bassúıek-mı jaraqaty bar, sondyqtan ol qazir jasandy tynys alý apparatyna qosylǵan. Onyń ústine dene jaraqattary da kóp.
«Patsıentke ota jasaldy, bala esin jıǵan joq», - dep naqtylady vedomstvodan.
Eske sala keteıik, buǵan deıin habarlaǵanymyzdaı, 7 qyrkúıekte Imanov pen Asan Qaıǵy kósheleriniń qıylysynda jol apatynan tórt bala zardap shekken bolatyn.
Aldyn ala málimetterge qaraǵanda, Asan Qaıǵy kóshesimen kele jatqan «Lexus» avtokóliginiń 36 jastaǵy júrgizýshisi Imanov kóshesiniń qıylysynda «Mersedes» kóligine jol bermesten ótýge umtylyp, soqtyǵysqan bolatyn.
Kólik soqtyǵysynan «Lexus» júrgizýshisi rýldi buryp, kámeletke tolmaǵan jaıaý júrginshilerdi basyp, jol boıynda turǵan «Lada» kóligin de túıip ótken. Budan soń, «Lexus» kóligi soqqynyń qattylyǵynan «ZAZ» markaly kóligine qaraı aýdarylyp, ol bolsa serpinmen taǵy bir «Mıttsýbısı» markaly kólikti soqqan. Jol-kólik oqıǵasy saldarynan jaıaý júrginshi tórt bala zardap shekti. Atap aıtqanda, 2002 jyly, 2005 jáne 2007 jyly týǵan tórt bala ártúrli dene jaraqatymen aýrýhanalarǵa jetkizildi.
