Astanada Jol qaýipsizdiginiń ulttyq tujyrymdamasynyń jobasy tanystyryldy
Otyrysqa Parlament depýtattary, Prezıdent ákimshiliginiń, Bas prokýratýranyń, ortalyq memlekettik organdardyń, ǵylymı ortanyń, halyqaralyq uıymdar men qoǵamdyq birlestikterdiń ókilderi qatysty.
Forýmda Quqyq qorǵaý organdarynyń akademııasy múddeli memlekettik organdar jáne úkimettik emes sektordyń sarapshylarymen birlesip ázirlegen Jol qaýipsizdiginiń ulttyq tujyrymdamasynyń jobasy tanystyryldy.
Otyrysta sóz sóılegen Bas prokýrordyń orynbasary Andreı Kravchenko kún tártibinde turǵan máseleniń ózektiligin atap ótip, júrgizýshiler men jaıaý júrginshilerdiń zańǵa baǵyný tártibin qalyptastyrýdyń jáne joldaǵy júris-turys mádenıetin arttyrýdyń mańyzdylyǵyn atap kórsetti. Sebebi árbir jol-kólik oqıǵasy jol qozǵalysyna qatysýshylardyń kinásinen bolady. Osy oraıda azamattardyń joldaǵy qaýipsizdigin qamtamasyz etýdiń problemalyq máselelerin sheshý úshin biryńǵaı qujat ázirleý qazirgi zamannyń qaýip-qaterlerine sáıkes jaýap bolyp tabylady.
Akademııanyń rektory Ulan Baıjanov atap ótkendeı, jol qaýipsizdigin qamtamasyz etý máseleleri búgin álemdik jáne ulttyq aýqymda ózekti sıpat alyp otyr. Elimizde júrgizilip otyrǵan jumystar keıingi jeti jylda joldaǵy ólimdi eki esege deıin tómendetýge múmkindik berdi. Búginde ol 100 myń turǵynǵa shaqqanda 15 adamdy qurap otyr. Biraq bul kórsetkish te Eýropa aýmaǵy elderiniń jáne keıbir TMD elderiniń arasynda joǵary bolyp qalýda.
2020 jylǵa qaraı jol-kólik oqıǵalarynan bolatyn ólim sanyn 100 myń turǵynǵa shaqqanda 6 adamǵa deıin tómendetý - Jol qozǵalysy qaýipsizdiginiń Ulttyq tujyrymdamasynyń basty mindeti. Mundaı nátıjege qol jetkizý úshin birneshe jyl boıy qajyrly eńbek etý qajet. Nátıjesinde bul Tujyrymdama Qazaqstannyń jol-kólik oqıǵalary kezindegi shyǵyn kórsetkishi eń tómen memleketterdiń qataryna kirýine múmkindik beredi. Aldaǵy ýaqytta jol apattary saldarynan adam óliminiń tómen deńgeıine qol jetkizýge jaǵdaı jasaý jáne oǵan jappaı umtylý tujyrymdamanyń basty maqsatyna aınalady,- dedi U.Baıjanov.
Jol qaýipsizdigi salasyndaǵy problemalardyń oń sheshimin tabý úshin Ulttyq tujyrymdamada zańnamalyq, bilim jáne tárbıe berý, aqparattyq, ǵylymı-ádistemelik, uıymdastyrýshylyq jáne tehnıkalyq máselelerdi qamtıtyn birqatar sharalar qarastyrylǵan.
Atap aıtqanda, eldi-mekenderdegi kóshe jáne jol jelilerin jasaý men damytýdyń ustanymdaryn qozǵalysty báseńdetý júıesin qoldana otyryp túbegeıli qaıta qaraý kózdelýde. Kóptegen ýchaskelerde, ásirese eldi-mekenderdegi jol qıylystaryndaǵy jyldamdyqty 50 km/saǵ. deıin, al táýekel aımaqtarynda 30 km/saǵ. deıin shekteý kerek. Apattyq jaǵdaıdy jasaǵan jáne jaıaý júrginshilerge jol bermegen júrgizýshilerdiń ákimshilik jaýapkershiligin qúsheıtý usynylady.
Júrgizýshilerdi daıarlaýdyń sapasyn arttyrý úshin avtomektepterde oqytý kýrstaryn qaıta jandandyrý jáne olarǵa jetekshilik etýdi Bilim jáne ǵylym mınıstrligine tapsyrý qajet. Balalardyń qorǵalýyn qamtamasyz etý maqsatynda mektepterde «Jol qozǵalysynyń erejeleri» pánin oqytý, balalarǵa velosıped júrgizýdi jáne jol ortasyna beıimdelýdi úıretý, jaryq qaıtaratyn bilezikterdi nemese balalar kıimderindegi elementterdi paıdalanýdy engizý máseleleri kóterildi.
Jol qozǵalysy qaýipsizdigi salasynda qyzmet etetin memlekettik organdardyń jumysyn tıimdi úılestirý úshin Joldaǵy qaýipsizdik jónindegi ýákil ınstıtýtyn engizý usynyldy.
Forýmdy qorytyndylaǵan U.Baıjanov joldaǵy qaza tabý sanynyń turaqty tómendeýine qol jetkizý úshin memlekettik organdardyń, úkimettik emes uıymdar men ǵylymı ortanyń kúsh-jigerin biriktirýge shaqyrdy.
Talqylaý qorytyndysy boıynsha jol qozǵalysy qaýipsizdigin qamtamasyz etýge jáne joldaǵy ólim deńgeıin tómendetýge baǵyttalǵan usynystar ázirlendi. Olar Ulttyq tujyrymdama jobasyn odan ári jetildirý kezinde qoldanylatyn bolady.