Astanada jol erejesin buzǵandar kamera arqyly anyqtalyp, jaýapqa tartyldy

ASTANA. KAZINFORM – Elordada jol erejesin saqtaý boıynsha aldyn alý jumysy kúsheıtildi. Jedel basqarý ortalyǵynyń kameralary arqyly jol erejesin buzǵan júrgizýshiler anyqtalyp, olarǵa tıisti shara qoldanyldy. Bul týraly qala ákimdiginiń resmı saıty Polıtsııa departamentine silteme jasap habarlady.

Polıtsııa qyzmetkerleri eń aldymen qaýipsizdik beldigin taǵý, kólikti basqarý kezinde uıaly telefondy paıdalanbaý, sondaı-aq kámeletke tolmaǵan jolaýshylardy tasymaldaý erejeleriniń saqtalýyna erekshe nazar aýdardy.

Jedel basqarý ortalyǵynyń kameralary birneshe quqyqbuzýshylyqty anyqtady, nátıjesinde júrgizýshiler jaýapkershilikke tartyldy.

Mysaly, 52 jastaǵy «Audi» avtokóliginiń júrgizýshisi Turan dańǵyly boıymen júrip kele jatyp, qaýipsizdik beldigin taqpaǵan. Bul fakt kamera operatorlary arqyly tirkelip, aqparat patrýlge dereý jetkizildi. Júrgizýshi jaýapkershilikke tartylyp, profılaktıkalyq áńgime júrgizildi.

Taǵy bir mysal, 54 jastaǵy «Hyundai» avtokóliginiń júrgizýshisi Turan dańǵyly boıymen júrip kele jatyp, uıaly telefonyn qoldanǵan.

Bul quqyqbuzýshylyq ta kameralarǵa túsip, aqparat patrýlge berilip, júrgizýshi jaýapkershilikke tartyldy.

Sonymen qatar, polıtseıler júrgizýshilermen profılaktıkalyq jumys júrgizdi: jol erejelerin saqtaýdyń mańyzdylyǵy túsindirilip, eskertpeler taratyldy. Arnaıy kóńil kámeletke tolmaǵandarmen birge júrgen júrgizýshilerge bólindi, olarǵa qaýipsizdik belbeýin qoldaný eskertildi jáne arnaıy qaýipsiz tasymaldaý quraldary berildi.

Mundaı aldyn alý sharalary quqyqbuzýshylyqty toqtatyp qana qoımaı, azamattardyń ómiri men densaýlyǵyn da qorǵaıdy.

Eske sala ketsek, buǵan deıin 12 naýryzdan bastap Qazaqstan Respýblıkasynyń Ákimshilik quqyq buzýshylyq týraly kodeksiniń 31-babyna Qazaqstan Respýblıkasynyń Tsıfrlyq kodeksi aıasynda qabyldanǵan ózgerister kúshine enetinin habarlaǵanbyz.