Astanada jol apatyna túsken 6 jasar balanyń anasyna ota jasaldy
ASTANA. QazAqparat - Jol apaty kesirinen samaı súıegi synǵan áıelge ota jasaldy, dep habarlaıdy «QazAqparat» HAA tilshisi Astana densaýlyq saqtaý basqarmasynyń baspasóz qyzmetine silteme jasap.
Vedomstvodaǵylardyń aıtýynsha, 25 qańtar kúni 22:00-de №2 qalalyq balalar aýrýhanasyna Saraıshyq kóshesine ulasyp jatqan kópirde bolǵan jol apatynan zardap shekken bala jetkizilgen. Alty jasar balaǵa «jabyq bas súıek-mı jaraqaty» dıagnozy qoıylyp, neırohırýrgııa bólimine jatqyzyldy.
«Qazir balanyń jaǵdaıy qalypty deýge keledi. Neırohırýrgııa bóliminiń dárigerleri turaqty qadaǵalap, emdep jatyr. Jol apatyna ushyraǵan mashınany balanyń anasy júrgizgen. Ol №1 qalalyq aýrýhanaǵa jetkizildi. 26 qańtarda sol jaq samaı súıeginiń ashyq synýy jaraqatyn alǵan áıelge ota jasaldy», - deıdi densaýlyq saqtaý basqarmasynyń baspasóz qyzmetindegiler.
Eske sala ketsek, 25 qańtar kúni keshkisin Astanadaǵy «Haıvıll» TK mańyndaǵy kópirde qaıǵyly jol apaty bolyp, er adam qaza tapqan, analy-balaly ekeý aýyr jaraqat alǵan bolatyn. Áleýmettik jelide qala turǵyndary balanyń sýreti jáne onyń týystary izdelip jatqany týraly habar taraldy. Keıin Astana ІІD zardap shekken balanyń týystary birden tabylǵany týraly málimdedi.
