Astanada jol apatynan eki aıaǵynan aıyrylǵan qyz bala aýrýhanadan shyqty

ASTANA.KAZINFORM — Jol-kólik oqıǵasy saldarynan aýyr jaraqat alǵan qyz bala aýrýhanadan shyǵaryldy. Bul týraly Densaýlyq saqtaý vıtse-mınıstri Tımýr Muratov málimdedi. 

— Búgingi tańda bala statsıonardan shyǵaryldy. Barlyq qajetti medıtsınalyq kómek tolyq kólemde kórsetildi. Ókinishke qaraı, bárimizge belgili, ómirin saqtap qalý úshin eki aıaǵyn ampýtatsııalaýǵa týra keldi, — dedi vıtse-mınıstr.

Onyń aıtýynsha, bala reabılıtatsııany Aqmola oblysyndaǵy Egindikól aýdanynda ótedi. Sebebi ol sol óńirge tirkelgen.

— Qazirgi ýaqytta emhana onyń jaǵdaıyna baılanysty jeke ońaltý baǵdarlamasyn ázirlep jatyr, — dedi Tımýr Muratov.

Eske sala keteıik, aıaǵynan aıyrylǵan qyzdyń otbasyna 20 mln teńgege jýyq tólem jasalǵanyn jazǵanbyz.