Astanada joq úılerdi jalǵa berip kelgen alaıaq áıel ustaldy

ASTANA. KAZINFORM — Ol Astana, Almaty qalalarynda jáne «Býrabaı» demalys bazasynda úılerdi jalǵa berýge ýáde etken, dep habarlaıdy elorda ákimdigi.

Astanada Kıberqylmysqa qarsy is-qımyl basqarmasynyń qyzmetkerleri jedel-izdestirý sharalary barysynda joq úılerdi jalǵa berýmen aınalysqan 29 jastaǵy áıeldi ustady.

Astana qalasy Polıtsııa departamentiniń baspasóz qyzmetiniń málimetinshe, kúdikti Krisha.kz saıtynda úılerdi jalǵa berý týraly jalǵan habarlandyrýlar jarııalaǵan.

— Jábirlenýshilermen hat almasý kezinde ol Astana, Almaty qalalarynda jáne «Býrabaı» demalys bazasynda úılerdi jalǵa berýge ýáde etken. Páter jaldaýǵa qyzyǵýshylyq tanytqan azamattar jalǵan bank shottaryna aldyn ala tólemderdi aýdaryp, keıin páter ıesimen baılanys úzilgen. Saldarynan jábirlenýshiler aqshasynan aıyryldy. Jedel is-sharalardyń nátıjesinde polıtsııa qyzmetkerleri kúdiktini anyqtap, qolǵa túsirdi. Ustalǵan azamatsha óz kinásin moıyndady. Qazirgi ýaqytta tergeý júrgizilýde, kúdiktiniń 5 epızodqa qatysy bar ekeni anyqtaldy, — delingen habarlamada.

Astana qalasynyń Polıtsııa departamenti azamattardy saq bolýǵa jáne aqsha aýdarýdan buryn aqparatty muqııat tekserýge shaqyrady.

— Eger siz alaıaqtyqtyń qurbany bolsańyz, dereý polıtsııaǵa habarlasý qajet. Aıta keteıik, bıyl Astana qalasy PD kıberqylmysqa qarsy is-qımyl bólimsheleriniń qyzmetkerleri aqparattyq tehnologııalar salasyndaǵy 66 qylmystyq quqyq buzýshylyqty ashty, — dep atap ótti vedomstvo.

Osyǵan deıin «Astananyń turaq keńistigi» JShS elorda ákimdiginiń menshigine ótkeli jatqany aıtyldy.